УИХ-ын өнөөдрийн чуулган үргэлжилж байна. Чуулганы үдээс хойших хуралдаанаар боловсролын салбарт хэрэгжүүлж буй шинэчлэл, үр дүн сэдвээр гишүүд хэлэлцэж байна.
УИХ-ын гишүүн С.Одонтуяа: “Бид нар 100 жилийн өмнөх сургуулийн боловсролын харах өнцгөө больж жаахан өөрөөр хандмаар байна. Нэг газар, нэг сургууль барьчихаад тэрэнд нь хотын бүх хүн хотын хэдэн талаас хүүхдээ зөөдөг асуудлаа өөрчилмөөр байна. Улаанбаатар хотод түгжрэл маш их байна. Зам тээврийн осол маш их байна. Ялангуяа бага ангийн хүүхдүүд маш их өртөж байна. Баянгол дүүрэгт гэхэд маш их том том хорооллууд бий болчихсон, нэг ч сургууль байхгүй. Тэгэхээр сургууль барих асуудлыг хувийн хэвшилтэй яриад хөөцөлдөж байна. Сургуультай болтол бага ангийн хүүхдийг хотхонд нь байрыг нь түрээслээд сургадаг тогтолцоог жаахан нэвтрүүлэх гэж оролдох хэрэгтэй. Өөрөөр хэлбэл Алтай хотхоны 100,200 хүүхдүүд хэдэн гудамж өнгөрөөд, хичнээн гүүр гараад өөр сургуульд явахад маш их түгжрэл үүсгэж байгаа. Тэрний оронд гэрийх нь хажууд багш нь нүүж очоод хотхонд нь бага ангийн хүүхдүүдийг сургачихмаар байна. Бага ангид бол нэг багш л зааж байгаа. Эцэг эхчүүдийн стресс бол өглөө яаж хүүхдээ зөөх вэ, өдөр яаж хүүхдээ авах вэ гээд бодсоор ажлын бүтээмж нь мууддаг. Гэр хороололд мөн адил. Тэгэхээр энэ асуудлыг ажлын хэсэг гаргаж шийдэж өгөөчээ. Хотхоны эцэг эхчүүдийг хуралдуулъя, энэ асуудлыг хамтраад шийдье. Хотхоны 30,40 хүүхдийг зөөж байхаар нэг багш нь ирээд заасан дээр” гэлээ.
Г.Бүжинлхам