Монгол Улсын 2023 оны төсвийн тухай, Нийгмийн даатгалын сангийн 2023 оны төсвийн тухай, Эрүүл мэндийн даатгалын сангийн 2023 оны төсвийн тухай хуулийн төслийг үргэлжлүүлэн хэлэлцэж байна. Хуралдааны үеэр гишүүд өөрсдийн эрх, үүргийн хүрээнд асуулт асууж, хариулт авч байна.
УИХ-ын гишүүн Ч.Ундрам гацсан ажлуудтай холбоотой асуудлаар холбогдох сайдаас асуулт асуулаа. Тэрбээр, Сэлэнгэ аймгийн Сүхбаатар сумын 4-р сургууль болон Сэлэнгэ аймгийн Мандал сумын 3-р сургууль маш олон жил гацсан. Эрх жилийн төсөвт эдгээр ажлуудыг тусгаагүй байна. Энэ тал дээр ямар арга хэмжээ авах вэ? Мөн боловсролын салбартай холбоотой ШУТ-ийн санд өмнө нь яригдаад байсан шинэчлэлүүд хийгдсэн үү, сангийн мөнгийг улс орны асуудлыг шийдэх чиглэл рүү хандуулж хэрэгцээ шаардлагатай судалгааг хийхэд зарцуулагдаж байна уу?” гэж асуулаа.
Ундрам гишүүний асуусан асуултад Сангийн яамны хөгжлийн санхүүжилт, хөрөнгө оруулалтын газрын дарга Ч.Чимидсүрэн хариуллаа. Тэрбээр “Сэлэнгэ аймгийн 320 хүүхдийн суудалтай 4-р сургууль, үүнд өмнөх онд 1,1 тэрбум төгрөгийн санхүүжилт төлөвлөсөн байна. Санхүүжилт болон гүйцэтгэл нь хянагдаж ирээгүй байгаа учраас төсөвт тусгагдаагүй байна. Мөн Мандал сумын 3-р сургууль 1,6 тэрбумын санхүүжилт авсан мөн ялгаагүй гүйцэтгэл нь ирээгүй учраас санхүүжилт нь гараагүй байна гэж хариулаа.
Мөн БШУ-ны сайд Л.Энх-Амгалан “2023 онд шинэ хөрөнгө оруулалт тавихгүйгээр өмнө нь эхлүүлсэн хөрөнгө оруулалтуудаа цэгцэлж авах нь зүйтэй. Үүнд нэг асуудал байна. Олон жил үргэлжилсэн санаатай болон санаагүйгээр төсөвт өртөг нь нэмэгдээд яваад байдаг, дураараа нэмэлт ажил төлөвлөж гэрээ хийдэг, хэзээ ч дуусдаггүй асуудлууд байна. 2023 онд үнэхээр өртөг нь нэмэгдсэн үү, үгүй юу гэдэгт анхаарч ажиллах зөв. Зарим компаниудтай хариуцлагын тогтолцоо руу орохгүй бол тендерийн хонгилоор явсаар сурчихсан, хэзээ ч ажил нь дуусдаггүй ажлаа хүлээлгэж өгдөггүй компаниуд их байна. Үүнийг зохицуулах хэрэгтэй. Мөн Ундрам гишүүн ШУТ-ийн сангийн санхүүжилт ил болсон уу гэж асуулаа. Бид бүгдийг нь ил болгосон байгаа. Цаашдаа ШУТ-ийн сангийн санхүүжилтийн олон хэлбэрүүдийг бий болгоно. Цөм буюу тэргүүлэх чиглэлээр улс орны тулгамдсан асуудлуудад шаардлагатай байгаа хэрэглээний судалгаануудыг хийхэд санхүүжилтийг зориулна. Өгөөж, үр дүнд суурилсан, тулгуурласан санхүүжилтийн ажлуудыг хийнэ” гэлээ.
Г.Бүжинлхам