Хууль зүй, дотоод хэргийн яамнаас Эрүүгийн хуульд нэмэлт, өөрчлөлт оруулах тухай хуулийн төслийн хэлэлцүүлгүүд хийж, ерөнхийдөө бэлэн болжээ. Эх сурвалжийн мэдээллээр ирэх долоо хоногоос Засгийн газрын хуралдаанд оруулж хэлэлцүүлэхээр бэлтгэсэн байна.
Тэгвэл эл хуулийн төсөлд "доромжлох" заалт шинээр оруулжээ. Өөрөөр хэлбэл хэн нэгнийг доромжилсон бол эрүүгийн хариуцлага хүлээж, хэрэгтэн болно гэсэн үг.
Тодруулбал эл хуулийн төсөлд:
13.15 дугаар зүйл. Доромжлох 1.Хүний нэр төр, алдар хүндийг олон нийтэд гутаан доромжилсон бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.
Үүнээс гадна хуулийн төсөлд авлига, албан тушаалын гэмт хэрэгтэй холбоотой бүлгийг бүхэлд нь хөндөж байгаа бөгөөд ингэхдээ энэ бүлгийн зарим төрлийн гэмт хэргийн шинжийг тодорхой болгох, зарим гэмт хэргийг шинээр нэмж хуульчлах, оногдуулах ялын бодлогыг чангатгах, хорих ялын хэмжээг нэмэгдүүлэхтэй уялдуулан хөөн хэлэлцэх хугацааг нэмэгдүүлэх, энэ бүлэгт заасан гэмт хэрэг үйлдсэн этгээдэд өршөөл, уучлал үзүүлэхгүй байх зэрэг зарчмын өөрчлөлтийг тусгаад байна.
