Ардчилсан нам, Монгол үндэсний Ардчилсан нам өнөөдөр нэгдэж, хамтран ажиллах "Санамж бичиг"-т гарын үсэг зурах ёслолын үйл ажиллагаа болж байна. Нэг зорилготой хоёр нам нэгдэж, хамтран ажиллах санамж бичигт гарын үсэг зурах түүхэн үйл ажиллагаанд хоёр намын дарга болон Удирдах Зөвлөлийн гишүүд оролцож байна.
Ардчилсан намын дарга С.Эрдэнэ” Өнөөдөр Ардчилсан нам болон Монголын үндэсний ардчилсан нам нэг нам болж ажиллахаар болж санамж бичигт гарын үсэг зурлаа. Өнөөгийн нийгмийн улс төрийн нөхцөл байдалтай холбоотойгоор шударга бус үйл явдалд хүчтэй нөлөө үзүүлэх замаар санал нэгдсэний үндсэн дээр 2 нам ийнхүү нэгдэхээр боллоо. Үнэт зүйл, үзэл санаа нэгтэй 2 нам нийлж байгаа. Цаашид ардчиллын үйл ажиллагааг нэмэгдүүлэх, бусармаг үйл ажиллагаанд хяналт тавих зэрэг олон чухал үйл ажиллагаанд хамтарч ажиллана. Та бид хамтдаа гар гараасаа барилцаж Монгол улсынхаа хөгжлийн төлөө урагшилна гэдэгт итгэл төгс байна” гэлээ.
Мөн энэ үеэр Монголын Үндэсний Ардчилсан намын дарга Б.Цогтгэрэл үг хэллээ. Тэрбээр “МҮАН-ын гишүүд зөвлөлдөөд Монголд шударга ёс, иргэний нийгмийн доройтол зэрэг олон үйл явдал болж байгаа учраас цаашид нэг үзэл баримтлалтай намууд нэгдэн ажиллаж байж Монголын ардчилал шинэ түвшинд гарах юм байна гэж үзэж байна. Хоёр нам нэгдсэнээр Ардчиллын төлөө зүтгэдэг нийгмийн хүчин болон хүмүүс нэгдэж нэг үнэт зүйлийн төлөө ажиллана гэж үзэж байна. Хоёр нам тодорхой хугацаанд тус тусдаа явж ирсэн. МҮАН 15 жилийн хугацаанд Монгол зон олонд хэрэглэж болох, тохирсон ардчиллыг хөгжүүлэхийн төлөө явж ирсэн. Гэвч өнөөгийн нөхцөл байдалд шинэ арга барилаар явах нь чухал боллоо. Тиймээс хоёр нам нэгдэж байна. Бусад ардчилсан үзэл баримтлалтай нам болоод шат шатны гишүүд, дэмжигчид биднийг дэмжин ажиллана гэдэгт итгэж байна” хэмээн хэллээ.
Г.Бүжинлхам
