Хаврын тариалалтын бэлтгэл ажлын явцын талаар ХХААХҮЯ-ны Хөрс, ургамал хамгаалал, үр сортын хэлтсийн дарга Д.Есөн-Эрдэнээс тодрууллаа.
-Энэ жил хичнээн мянган га газарт тариалалт хийв. Одоогийн байдлаар ургац хураалт ямар шатандаа явж байна вэ?
-2022 онд улсын хэмжээгээр 378.1 мянган га-д үр тариа, үүнээс 353.1 мянган га-д улаанбуудай, 19.9 мянган га-д төмс, 11.1 мянган га-д хүнсний ногоо, 57.4 мянган га-д малын тэжээл, 117.4 мянган га-д тосны ургамал, 4.6 мянган га-д жимс, жимсгэнэ, нийтдээ 588.5 мянган га-д тариалалт хийсэн.Ургацын урьдчилсан балансаар 470.3 мянган тонн үр тариа, үүнээс 441.4 мянган тонн улаанбуудай, 234.1 мянган тонн төмс, 125.8 мянган тонн хүнсний ногоо, 55.7 мянган тонн тосны ургамал, 104.4 мянган тонн малын тэжээлийн ургамал тус тус хураан авах боломжтой гэсэн төлөв гарсан. Ургац хураалтын явц өнөөдрийн байдлаар 31.6 мянган га-гаас 37.9 мянган тонн үр тариа, үүнээс 30.3 мянган га-гаас 36.3 мянган тонн улаанбуудай, 7.9 мянган га-гаас 92.9 мянган тонн төмс, 3.8 мянган га-гаас 35 мянган тонн хүнсний ногоо, 2.9 мянган га-гаас 9.4 мянган тонн тэжээлийн ургамал, 3.8 мянган га-гаас 1.2 мянган тонн тосны ургамал тус тус хураан авсан мэдээтэй байна. Өөрөөр хэлбэл, үр тариа хураалт 20 гаруй хувьтай, төмс 50 гаруй хувь, хүнсний ногоо 30-40 хувьтай үргэлжилж байна.
-Энэ жил газар тариалангийн зарим бүс нутагт зуншлага тааруу байсан. Ургацын хэмжээнд нөлөөлөх болов уу?
-Энэ жилийн тухайд баруун аймгуудад зуншлага тааруу байгаа. Тариалангийн гол бүс нутгуудад зуншлага харьцангуй сайн байсан учраас ургацын хэмээнд нөлөө үзүүлэх хэмжээнд хүрэхгүй байх гэж таамаглаж байна. Бид ирэх сарын дундуур гэхэд ургац хураалт бүрэн дууссан байх болов уу хэмээн таамаглаж байна. Цаг агаар огцом хүйтэрч, талбайд мал орохгүй байвал энэ жилийн ургац хураалтыг хүндрэл багатай туулах болов уу хэмээн найдаж байна.
-Цаг агаарын урьдчилсан төлөвөөр ургац хураалтын үеэр цочир хүйтрэх төлөв ажиглагдаж байна уу?
-Энэ сар хэд хэдэн удаа цас, бороо орсон нь ургац хураалтын үйл явцыг багахан саатуулсан. Энэ долоо хоногийн цаг агаарын урьдчилсан мэдээгээр хур тунадас орж, цочир хүйтрэх төлөв ажиглагдахгүй байна.
-Ургац хураалтыг хугацаанд нь дуусгахад хүн хүчний нөөц хамгийн чухал. Нийт хичнээн оюутан залуус ургац хураалтад ажиллаж байна вэ?
-Улсын хэмжээнд таван их, дээд сургууль ЗХЖШ-ын 18 анги нэгтгэлээс нийт 3102 оюутан цэргийн албан хаагч ургац хураалтад оролцохоор аж ахуйн нэгжүүдтэй гэрээ байгуулан ажиллаж байна.
-Дизель түлшний нөөцөө иргэд, ААН-үүд хангалттай бэлдэж чадсан болов уу?
-Ашигт малтмал, газрын тосны газраас өгч байгаа мэдээллээр ургац хураалтад ашиглагдах шатахууны нөөц хангалттай байгаа. Түүнчлэн үр тариа болон төмс, хүсний ногооны агуулах сав хангалттай хүрэлцэхүйц хэмжээнд бий.
