Ардчилсан Залуучуудын холбооноос өнөөдөр зохион байгуулж байгаа жагсаалынхаа талаар мэдээлэл өглөө.
АЗХ-ны дарга Н.Болдбаатар: “Саяхан ХНХ-ын сайд Д.Сарангэрэл УЛны айл хэмээн ард түмнээ доромжилсон. Энэ үгийг Манж, Хятадууд дээр үед хамгийн бага түвшин буюу хамгийн ядуу айлуудаа ингэж нэрлэдэг байсан. Непалд маш бохир ядуу хүнийг УЛны гэж нэрлэдэг байсан бөгөөд тэдгээр хүмүүс дээдсүүддээ хүрэх эрхгүй, дээдсүүд нь хэзээ ч хүрч болохгүй гэж үздэг. Энэ хэллэгийг оруулж ирсэн нь үнэхээр гайхал төрүүлж байна. Үндсэн хуулийг уландаа гишгэж ингэж ярина гэдэг бол ЗГ хэрхэн бүрэлдсэн , ямар хүмүүсээр удирдуулж байна вэ гэдэг харагдаж байна. Хүний эрхийн мэдрэмжгүй сайд нар ар араасаа гарч байна. Бид жагсахдаа 3 шаардлага тавьсан.
- Ард түмнээсээ уучлал гуйх ёстой. Зөвхөн ХНХ-ын сайд биш Ерөнхий сайд өөрөө уучлал гуйх ёстой
- Ёс бус үг хэллэг ашигласан сайд огцрох ёстой
- Хүний эрхийн мэдрэмж байхгүй Үндсэн Хуулиа зөрчсөн юм чинь засгийн газрын гишүүний хувьд ЗГ өөрөө бүрэн бүрэлдэхүүнээрээ огцрох ёстой гэсэн 3 шаардлагыг тавьсан.
Зөвхөн үг хэлснийх нь төлөө огцор гэж байгаа юм биш. Өнөөдөр нийгэм, эдийн засгийн байдал үнэхээр хүнд байна. Долларын ханш маш богино хугацаанд нэмэгдэж, өдөр ирэх тусам өргөн хэрэглээний барааны үнэ нэмэгдэж байна. Тийм учраас залуучууд бид эвлэлдэн нэгдэж болохгүй байгаа зүйлийнхээ төлөө дуу хоолойгоо өргөе. Өнөөдрийн ард түмний амьдралыг харахад нэг хэсэг нь маш ихээр баяжиж төрийн толгойд гарсан байна. Нөгөө хэсэг нь маш ихээр ядуурч бизнес нь дампуурсан байна. Тийм учраас бид нийгмийг өөрчлөх ёстой” гэлээ.
Г.Бүжинлхам