Ард иргэдийн 70 хувь нь УЛ-ний иргэд болчихсон энэ үед Улсын Их Хурлын гишүүн, Хууль зүйн байнгын хорооны дарга Л.Мөнхбаатараар ахлуулсан Улсын Их хурлын гишүүн Д.Цогтбаатар, Ш.Раднаасэд, Ц.Сандаг-Очир, Ц.Сэргэлэн, Х.Ганхуяг нарын “ПОП” бүрэлдэхүүнтэй гишүүд Америкийн Нэгдсэн Улсад ажлын айлчлал хийх нэрээр “ЗУГААЛЖ” явна. Бүр олноороо “БАГААРАА” зугаалж явна гэнэ шүү.
Бор зүрхээрээ ажиллаж байгаа иргэдийн мөнгөөр АНУ-ын хууль зүйн хэрэгжилтийг судлах нэрээр олноороо зугаалж байгаа явдалд иргэд ч бухимдаж байгаа нь илт. Энгийнээр тайлбарлахад эдийн засгийн хувьд харьцангуй хөгжчихсөн улс орны хуулийг , Эдийн засаг нь уналтад ороод сүйрэх дөхсөн манай орны хуультай харьцуулж судалгаа хийж яваа нь яг ямар үр өгөөжтэй вэ? Хууль зүйн хэсэг бүлэг “НӨХӨД” улс орондоо тулгамдсан асуудлаас зугтаж, харин яаж, ямар хууль, хаана хэрэгжиж хэдэн төгрөгийн зөрчил яаж ногдуулдаг вэ, түүгээр яаж ашиг олж болох вэ гэдэгт л анхаарал хандуулах юм.
Төрийн хэмнэлтийн тухай хууль гэдэг нь өөрийн мөнгийг гамнаад улсын мөнгөөр зугаалаад бай гэсэн утгатай биш шүү дээ. Хуулиндаа төр, түүний бүх шатны байгууллага, нийтийн алба, тэдгээрийн үйл ажиллагаанд санхүүгийн сахилга батыг мөрдүүлж, ил тод байдлыг хангах, үр ашгийг нэмэгдүүлэх, ҮРЭЛГЭН БАЙДЛЫГ ХЯЗГААРЛАХ, хяналт тавихтай холбогдсон харилцааг зохицуулахад оршино гэсэн байдаг. Гэвч Хууль зүйн байнгын хорооны гишүүдийн гаргасан энэ үйлдэл хэмнэлтийн хуультайгаа ч тэр, хийх ажилтайгаа ч тэр ер таарахгүй байх юм.
Сурагчдын үдийн цайны мөнгөнд хүрдэггүй, ажилчдынхаа цалинг олигтой нэмж чаддаггүй төсөвтэй хэр нь ХЗБХ-ны гишүүдийг багаар нь АНУ-д аялуулах төсөвтэй хэрэг үү. Үр хүүхдүүд /иргэд/ нь “ЖОНХУУ” идэж байхад аав ээж /төр/ нь Америкт аялаад 5 одтой буудалд буугаад тансаглаад байж болох уу?
Хөөрхий “УЛ”-ний гэсэн муу нэртэй гэмгүй хэдэн ардын мөнгөөр ингэж зугаалж явдаг хэр нь тэднийгээ яамны ажилчид нь үгийн муухайгаар хэлж доромжилдгийг бид чихээрээ сонссон. Ерөөсөө л эрх баригчдын хийдэг ажил нь татвар төлөгчдийн мөнгөөр харьд туршлага судлах нэрийдлээр зугаалах болж, харин иргэдийн ажил нь тэднийг судалгаа нэртэй зугаалгад явуулахын тулд татвараа төлөх болж байна.
Хэрэв иргэдээ боддог, улсаа боддог “ТӨР” байсан бол хэмнэлтийн хуулиа бодитой хэрэгжүүлээд цөөн хэд нь яваад ирж болох байсан. Гэвч “ПОП” багаа бүрдүүлээд ийнхүү явсныг зугаалж байна гэхээс өөр юу гэж ойлгох вэ.
Г.Бүжинлхам
