БНХАУ-ын дарга бөгөөд тус улсын Цэргийн төв зөвлөлийн дарга Ши Жиньпин “Хятадын Ардын Чөлөөлөх Арми жинхэнэ байлдааны бэлтгэлд анхаарлаа хандуулах ёстой” гэж мэдэгджээ.
Хятадын төв телевизийн мэдээлснээр, төрийн тэргүүн Бээжинд болсон Үндэсний батлан хамгаалах, цэргийн шинэчлэлийн семинарт оролцогчдод ийм заавар илгээжээ. Уг арга хэмжээнд ХКН-ын төв хорооны Улс төрийн товчооны гишүүд оролцсон аж.
БНХАУ-ын дарга мөн армийн шинэчлэлийн зорилгод хүрэх төлөвлөгөөг чанд баримтлахыг үүрэг болгов.
Үүнтэй холбоотойгоор лхагва гарагийн өглөө ХАЧА-ын байлдааны командлалын зүүн бүсийн албан ёсны төлөөлөгч Ши И хэлэхдээ, Тайваний хоолойгоор Америк, Канадын тэнгисийн цэргийн хөлөг онгоцууд дайран өнгөрсний дараа Хятадын анги нэгтгэлүүд байлдааны өндөржүүлсэн бэлэн байдалд байна. Цэргүүд бүх аюул заналхийллийг эсэргүүцэж, улсын бүрэн эрх, нутаг дэвсгэрийн бүрэн бүтэн байдлыг хамгаалахад бэлэн байна гэж тус командлалын төлөөлөгч онцлон тэмдэглэв.
Тайванийг тойрсон хурцадмал байдал
Бээжингийн Вашингтон, Тайбэйтэй харилцах харилцаа наймдугаар сард хурцадсан. Энэхүү хурцадмал байдлын уг сурвалж нь АНУ-ын Төлөөлөгчдийн танхимын дарга Нэнси Пелоси аралд хийсэн айлчлалтай холбоотой байв. Тайванийг өөрийн нэг муж гэж үздэг Хятад улс энэ айлчлалыг Тайванийн салан тусгаарлах үзлийг АНУ дэмжиж буйн илрэл гэж буруушаажээ.
Үүний дараа Цагаан ордон "нэг Хятад" зарчмыг баримталж байгаагаа дахин нотолсон боловч Ерөнхийлөгч хууль тогтоох байгууллагын төлөөлөгчдийн шийдвэрт нөлөөлөх боломжгүй гэж тайлбарласан юм.
Хятадын армийн шинэчлэл
2015 онд Хятадын эрх баригчид зэвсэгт хүчнийхээ үр нөлөөг нэмэгдүүлэхийн тулд шинэчлэл хийхээ мэдэгдсэн. Ши Жиньпин хэлэхдээ, шаардлагатай бол ямар ч дайсныг няцаах чадвартай хэт орчин үеийн арми тус улсад бий болох ёстой. Хамгийн чухал шаардлага бол байлдааны бэлэн байдал, ялах чадвар юм гэж БНХАУ-ын дарга онцолсон юм.
Энэ шинэчлэлийн хүрээнд ХАЧА стратегийн пуужингийн цэргийг байгуулж, одоо БНХАУ-ын хуурай газар, агаар, тэнгисийн цэрэг, ардын зэвсэгт цагдаагийн хамт Хятадын Зэвсэгт хүчнийг бүрдүүлж байна.
2017 онд болсон БНХАУ-ын Коммунист намын 19-р их хурлын нээлтийн үеэр ч Хятадын удирдагч 2035 он гэхэд зэвсэгт хүчний шинэчлэлийг дуусгаж, өнөөгийн цаг үеийн сорилтод бүрэн нийцүүлэхээр төлөвлөж байна гэжээ.
Эх сурвалж: РИА новости
