Хүйтэн, сэрүүний улирал эхлэхтэй зэрэгцэн эрчим хүч, дулааны хэрэглээ огцом нэмэгддэг. Гэвч өсөн нэмэгдэж байгаа уг хэрэглээг бүрэн хангаж чадахгүй нөхцөл байдалд орсон гэдгийг хаа хаанаа хүлээн зөвшөөрөөд байгаа юм. Хэрэглээг хангахад эрчим хүчний шинэ эх үүсвэр хэрэгтэй. Гэвч ойрын 4-5 жилд шинээр эх үүсвэр барих боломжгүй. Тиймээс эрчим хүчээ хэмнэх гэсэн ганц арга зам л бидэнд үлдээд байна.
Манай улсын эрчим хүчний суурилагдсан хүчин чадал бол 1500 мегават. Өнгөрсөн жил оргил ачааллын үед 1387 кв хүрсэн юм. Харин энэ жил хэрэглээ 4-6 дахин нэмэгдэнэ гэсэн тооцооллыг мэргэжлийн байгууллагууд гаргасан. Улмаар эрчим хүчний хязгаарлалт хийх өндөр магадлалтай гэдгийг салбар хариуцсан өмнөх сайд мэдэгдээд байсан юм. Шинэ эх үүсвэртэй болох хамгийн наад захын хугацаа бол 2026 он. Тэр хүртэл хязгаарлалт хийхгүй байх гол гарц нь эрчим хүчний хэмнэлт гэж тайлбарлаж буй. Мөн оргил ачааллын үеийн эрчим хүчний үнэ тарифтай болох ёстойг тус салбарын зохицуулах хорооноос онцолж байна.
Эрчим хүчний хэрэглээ шөнийн цагт харьцангуй багасдаг. Гэхдээ эрчим хүч үйлдвэрлэл тасралтгүй явагдаж байдагтай холбоотойгоор шөнө үйлдвэрлэсэн эрчим хүчийг хуримтлуулах станц байгуулах шийдвэрийг гаргасан. Тэгвэл шөнийн эрчим хүч хуримтлуурын станцыг 2023 онд ашиглалтад оруулахаар төлөвлөж буй.