“Монгол газар” ХХК-ийн захирал Ц.Мянганбаяр өдгөөгөөс долоон жилийн өмнө дампуурлаа зарлаж буйгаа өөрийн биеэр, сонин хэвлэлээр мэдэгдэж байв. Тэрбээр үүргээ биелүүлж чадахгүй болсон тул дампуурлын хэрэг үүсгэх тухай хүсэлт гаргаж байсан юм.
Улмаар түүний хүсэлтийг Дүүргийн Иргэний хэргийн анхан шатны хоёрдугаар шүүхийн шүүгчийн 2014 оны наймдугаар сарын 11-ний өдрийн захирамжаар Дампуурлын хэрэг үүсгэж, 2015 оны нэгдүгээр сарын 20-ны өдрийн захирамжаар “Монгол газар”ХХК-ийг төлбөрийн чадваргүйд тооцсон юм.
Эл өдрөөс хойш "Монгол газар" ХХК нь ямар нэгэн үйл ажиллагаа эрхлээгүй өдийг хүрсэн. Мэдээж компани дампуурсантай холбоотойгоор тус компанитай хамтарч ажиллаж байсан иргэн, аж ахуй нэгжүүд хохирч үлдсэн бөгөөд шүүхэд гомдол гаргаад өдийг хүрч буй юм.
Тэгвэл эх сурвалжийн мэдээлж буйгаар "Монгол газар" ХХК-д холбогдох дампуурлын хэргийг шүүх хянан шийдвэрлэх явцад нийт 139,318,919,820.19 буюу 139 тэрбум 318 сая төгрөгийн нэхэмжлэлийг 13 байгууллага аж ахуйн нэгж, иргэнээс шүүхэд ирүүлсэн байдаг аж. Түүнчлэн "Монгол газар" ХХК нь Татварын ерөнхий газрын Улсын төсвийн орлого, хяналтын газар болон Нийслэлийн Татварын газарт олон тэрбумын татварын өртэй байгаа юм байна.
Улмаар дээрх өр төлбөрөө барагдуулахын тулд БОАЖЯ болон АМГТГ-аас хүчингүй болгосон, Архангай аймгийн Цэнхэр сумын нутагт байрлах ашигт малтмалын ашиглалтын MV-0024**, MV-0024** дугаартай тусгай зөвшөөрлүүдээ буцааж авахаар шүүхдэж яваа аж.
Тус компанийн зүгээс Дампуурлын тухай хуулийн 17 дугаар зүйлийн 17.1 дэх хэсэгт заасны дагуу “Дампуурлын хэрэг үүсгэхэд хариуцагчийн өмчлөлд байсан буюу түүнийг татан буулгаж улсын бүртгэлээс хасах хүртэлх хугацаанд шинээр бий болсон өмчлөлийн зүйлс, тэдгээрээс бий болох ашиг, орлогыг хариуцагчийн хуваарилагдах эд хөрөнгөд хамруулна” гэж заасан. Тиймээс "Монгол газар" ХХК-ийн эзэмшлийн ашигт малтмалын ашиглалтын MV-0024**, MV-0024** тоот тусгай зөвшөөрлүүд хуваарилагдах хөрөнгөд хамаарах ёстой гэж үзэж буй юм байна.
Эх сурвалж: Eguur.mn
