E-Mongolia платформыг ашиглан и-бизнес цэсээр компани нээх, мөн аж ахуйн нэгжийн улсын бүртгэл авах боломжтой болж байгааг салбарын яамнаас мэдээллээ.
Цахим Хөгжил, Харилцаа Холбооны сайд Н.Учрал: "Гадаадын хөрөнгө оруулагч заавал манай оронд ирэхгүйгээр компани байгуулаад үйл ажиллагаагаа явуулах боломж бүрдэнэ. Ялангуяа технологийн компаниудад ийм байдлаар үйл ажиллагаагаа явуулах таатай орчин бий болж байна гэж үзэж байна. Цаашид тоон гарын үсгийг бүрэн хэрэглээнд нэвтрүүлж иргэдийн ажлыг хөнгөвчлөхөд таатай орчин бүрдүүлэхийг зорьж ажиллана" гэлээ.
Мөн цахим багц хуулийг амьдрал дээр хэрэгжихэд саад болж байгаа зарим дүрэмд өөрчлөлт оруулна гэв. Тухайлбал иргэн E-Mongolia системээр нэвтрээд өөрийн бичиг баримтаа үзүүлээд төрийн үйлчилгээ авах гэтэл зарим байгууллагууд наториатаар баталгаажуулж ирэхийг шаарддаг байна. Үүнийг шийдвэрлэх дундын систем байхгүй учраас ийм асуудал гардаг байна. Үүнийг яаралтай шийдвэрлэх шаардлагатай гэлээ.
E-Mongolia систем төрийн өмчийн 83 байгууллагын 680 гаруй үйлчилгээг цахимжуулжээ. Нээлттэй мэдээллийн ил тод байдлын тухай хуулийн хэрэгжилтийн үр дүнд цугласан мэдээллийг иргэдэд түгээхэд E-Mongolia системийг ашиглана гэлээ. Хуулийн шинэчлэлээр 68 төрлийн мэдээллийг нээлттэй болгож эхний ээлжинд төрийн өмчит компаниудын ТУЗ-ын гишүүдийн мэдээллийг ил болгохоор болжээ. Ингэснээр ашиг сонирхлын зөрчилтэй хүмүүсийн мэдээлэл ил болно гэж цахим хөгжлийн яамнаас мэдээллээ.
