ИЛ ЗАХИДАЛ
Та бүхэнд энэ өдрийн мэндийг дэвшүүлье.
Мөнхийн хөршүүд болох ОХУ, Монгол Улсын хооронд дипломат харилцаа тогтоосноос хойш 101 жил өнгөрөөд байна. Хоёр орны найрсаг, хамтын ажиллагаа олон талт хэлбэрээр өргөжин хөгжиж, ялангуяа сүүлийн 30 жилийн хугацаанд боловсролын салбарт амжилттай ажиллаж буй сайн жишээ бол Монгол-Оросын хамтарсан 3-р сургууль юм. Тус сургууль нь одоогийн байдлаар нийт 2715 сурагч, 300 гаруй багш, ажилчдын бүрэлдэхүүнтэйгээр үйл ажиллагаа явуулдаг бөгөөд тус сургуулийн үе үеийн төгсөгчид цаг ямагт хоёр улсын “хамтын ажиллагааны гүүр” болж байдгийг онцлон тэмдэглэе.
Сүүлийн үед сошиал орчинд “хэсэг бүлэг шантаажчин сэтгүүлчид” Монгол-Оросын хамтарсан сургуулийн үйл ажиллагааг янз бүрээр харлуулах, багш ажилчдыг гутаан доромжлох, сурагч хүүхдүүдийг заналхийлэх, олон нийтийг өдөөн турхирах зэрэг гэмт хэргийн шинжтэй бусармаг, ёс зүйгүй байдал газар авч байгаад маш их санаа зовинож байна. Ямар нэг эх сурвалж, нотлох баримтгүйгээр аливаа худал мэдээллийг санаатайгаар сошиалд сэвж, тэр дундаа Ж.Соронзон захирлын нэр төр, ажил хэргийн алдар хүндэд бүдүүлгээр халдаж, шүүхээр гэм буруутай нь тогтоогдоогүй байхад хань ижил, үр хүүхэд, гэр бүлээр нь нийгэмд яллаж, “алуурчин, эмгэн, авлигачин” гэж гутаан доромжилж, сэтгэл зүйн байнгын дарамт шахалтад оруулж байгааг анхаарч үзэж дорвитой арга хэмжээ авахуулахыг хүсэж байна. Тус сургуулийг “тоногдсон балгас” байхад Ж.Соронзон захирал анх хүлээн авч, өдгөө Монгол Улсад Тэргүүлэх чиглэлийн боловсролын байгууллага болтол нь нөр их хөдөлмөрлөж, ухамсарт бүх амьдралаа зориулсан гавьяат багш, доктор, багш сурган хүмүүжүүлэгч билээ. Орос 3-р сургууль нь “Монгол Улсын тэргүүний сургууль”-аар гурван удаа шалгарсан цорын ганц сургууль болтол удирдан зохион байгуулсан захирал Ж.Соронзонг ОНМХ-ээр зохион байгуулалттайгаар гүтгэн доромжилж, нэр төр, ажил хэргийн алдар хүндэд бүдүүлгээр халдаж байхад таслан зогсоох арга хэмжээ авсангүй. Түүгээр барахгүй Ж.Соронзон захирлыг ямар нэгэн хууль зүйн үндэслэлгүйгээр 2022 оны 09-р сарын 07-ны өдөр БШУ-ны сайд Л.Энх-Амгалан ажлаас чөлөөлөх тушаал гаргасны улмаас сошиал орчинд тус сургуулийн багш, сурагчдын талаар заналхийлсэн, доромжилсон, гүтгэсэн зохисгүй байдал улам газар авлаа. Хамгийн ноцтой нь Ж.Соронзон захирлыг албан ажлаас нь халах тушаал гаргахдаа БШУ-ны сайд нь өөрөө алдаа гаргаж, Хамтарсан сургуулийн дүрэм, журамд тусгагдсан “Гүйцэтгэх удирдлагыг солих, томилох асуудлыг оросын талтай зөвшилцсөний үндсэн дээр Удирдах зөвлөлийн гишүүдийн олонхын саналаар шийдвэрлэнэ” гэсэн зүйл, заалтыг ноцтойгоор зөрчлөө.
Үүнээс үүдэн тус сургуульд суралцдаг бидний 2700 гаруй хүүхдүүд байнгын айдастай явах болж, сургуулийн нэр хүнд асар ихээр унаж, багш болон эцэг эхчүүд үр хүүхдүүдтэйгээ хамт “авлигачин” гэх мэтээр нийгэмд ялгаварлан гадуурхалд өртөж, Үндсэн хуулиар олгогдсон эрхүүд зөрчигдөхөд хүрлээ.
Ийм ноцтой нөхцөл байдлыг үүсгэсэн nuuts.mn, neguun.mn, tsakhuir.mn зэрэг мэдээллийн сайтуудад ажилладаг өөрсдийгөө “сэтгүүлч” гэж нэрийдсэн “хэсэг бүлэг шантаажчин балмад этгээд”-үүд сүүлийн нэг жилийн хугацаанд тус сургуулийн нэр хүндийг нийгэмд унагаахад чиглэсэн төрөл бүрийн мэдээ, мэдээлэл, контентуудыг тасралтгүй бэлтгэн нийгмийн сүлжээнд цацаж түгээсэн явдалд эцэг эхчүүд бид эсэргүүцэж байна.
Тухайлбал, 2022 оны 08-р сарын 30-ны өдөр “тус сургуулийн сурагчид дайныг дэмжиж ОХУ-ын туг, далбааг хичээлийн шинэ жилийн нээлт дээр барьж жагсах гэж байна” гэсэн маш муухай гүтгэлгийг нийгэмд зориудаар тараасныг хэлж болно. Тус сургуулийн зүгээс хичээлийн шинэ жилийн нээлтэд ирэхдээ сурагчдыг Оросын туг, далбааг заавал барьж ир гэсэн шаардлагыг огтхон ч тавиагүй бөгөөд бидний хүүхдүүд өөрсдийн суралцдаг 8 улсын хэлийг хүндэтгэн улс орнуудын туг далбааг уламжлал ёсоор барьж зогссон билээ. Сэтгүүлч гэх С.Будрагчаа нь нээлтэд оролцож байсан бага ангийн сурагчдын биед халдаж, түлхэж унагаасан бөгөөд зохих ёсны шаардлага тавьсан эцэг эхчүүдтэй маргалдан өдөөн хатгаж, танхайрах үед видео камераа эвдэрснийгээ “Оросын цэрэг, тусгайгийн бэлтгэгдсэн ажилтнууд миний биед халдаж, тоног төхөөрөмжийг маань эвдлээ” хэмээн худал ташаа мэдээлээд зогсохгүй сургуулийн байр руу нэвтрэхэд саад хийсэн орос багш нарыг “фашистууд, нацистууд зайл, нутаг дээрээ яах нь миний эрх, би сэтгүүлч учраас хаа ч нэвтрэх эрхтэй” хэмээн доромжилсон бичлэг нийгмийн сүлжээгээр тараасан нь хоёр орны дипломат харилцаанд сэв суулгахаар авирласанд харамсаж байна.
Энэхүү хууль бус үйл явцыг БШУ-ны сайд Л.Энх-Амгалан улам дэвэргэж, neguun.mn сайтад ярилцлага өгч, МОХС-ийг олон улсын сургуулийн статустай гэдгийг тайлбарлахын сацуу Ж.Соронзон захирлыг “...энэ авгайг өмөөрөөд, хууль хяналтын байгууллагыг атгачихаад, ...мафижсан захирал байж болохгүй..” гэх мэтчилэн сөрөг, худал зүйл ярьсан нь зохион байгуулалттайгаар тус сургуулийн багш сурагчид болон сургуулийн захирлын нэр төр, ажил хэргийн алдар хүндийг гутаан доромжлоод зогсохгүй Орос 3-р сургуулийн удирдлагыг хууль бусаар булааж авахаар санаархсан хэсэг бүлэг хүмүүсийн зүгээс явуулсан хууль бус үйл ажиллагааг дэмжсэн ёс зүйгүй үйл явдал боллоо.
Сэтгүүлч гэх дээрх этгээдүүдийн хууль бус үйлдэл нь оросын эсрэг үзлийг дэвэргэх давхар зорилготой байсан гэж бид үзэж байна. Үүний улмаас сургуульд хөдөлмөрийн гэрээгээр ажиллаж буй ОХУ-ын 235 иргэний эрүүл мэнд, амь насанд аюул учрах эрсдэл үүсээд байна. Учир нь, тус сургуулийн зарим багш ажилтнууд дээрх үймээн самууны үеэр хүнд, хөнгөн бэртэл авсан бөгөөд харьяа дүүргийн Цагдаагийн байгууллагад өргөдөл, гомдол гаргаад байна.
Орос 3-р сургуульд элсэн суралцах хүсэлтэй хүүхдүүдийн тоо жил бүр өсөн нэмэгдэж, олон зуун хүүхдүүд бүртгэлд хамрагддаг билээ. Бүртгэлд хамрагдсан хүүхдүүдээс шударгаар элсэлтийн шалгалт өгч тэнцсэн 150 хүүхэд тус сургуулийн босгыг алхаж ордог учиртай. Үе үеийн төгсөгчид нь гадаад, дотоодын нэр хүндтэй их, дээд сургуулиудын уралдаант шалгалтад тогтмол дээгүүр байр эзэлж, дэлхийн топ сургуулиудад өндөр тэтгэлэгтэйгээр элсэн суралцдаг нь тус сургуулийн захирал Ж.Соронзонгийн олон жилийн уйгагүй хөдөлмөр, хичээл зүтгэлийн үр дүн мөн гэж эцэг эхчүүд бид хүндэтгэж явдаг. Түүнчлэн МОХС-ийн төлбөрийг сүүлийн жилүүдэд Монгол Улсад байж болох хамгийн доод хэмжээнд тогтвортой барьж, санхүүгийн оновчтой менежмент хийж байгаа нь тус сургуульд суралцагчийн ар гэрт бодитой дэмжлэг болсныг сонордуулья.
Эцэг эхчүүд бид БШУ-ны сайд Л.Энх-Амгалангийн гаргасан энэ хууль бус тушаал, шийдвэрийг эрс эсэргүүцэж байгаа бөгөөд бүх зүйл хууль, журмын дагуу явагдах ёстой гэсэн байрь сууртай байна.
Бид Ж.Соронзон захирлыг тус сургуулийг тодорхой хугацаанд үргэлжлүүлэн удирдаж, өөрийн удирдлагын менежментийн залгамж халааг бэлтгэж, үүрэгт ажлаа нэр төртэй шилжүүлэн өгөх ёстой гэж үзэж байна. Нийт эцэг эхчүүдийн байр суурийг бүрэн дүүрэн илэрхийлсэн албан шаардлагыг БШУ-ны сайд, ЗГХЭГ-ын дарга, сургуулийн Удирдах зөвлөлийн даргад албан ёсоор хүргүүлсэн бөгөөд нааштай хариу авна гэдэгт итгэж байна. ОХУ-ын ЭСЯ-аар уламжлуулан Оросын талд бид өөрсдийн байр суурь, албан хүсэлтийг уламжилсан болно.
Иймд та бүхэн дээрх асуудлыг анхааралтай судалж, үнэн зөвийг тогтоохын тулд шаардлагатай бүх дэмжлэг, туслалцааг үзүүлнэ гэдэгт итгэлтэй байна.
Жич: Эцэг эхчүүдийн гарын үсэг, холбогдох баримтыг хавсаргав.
Та бүхэнд ажлын амжилт хүсье!
Хүндэтгэсэн,
МОХС-ийн суралцагчдийн эцэг эхчүүд
2022 оны 09 дүгээр сарын 09-ний өдөр