Херсон мужид хийсэн сөрөг довтолгоонд оролцсон Украины армийн зарим хэсэг Оросын цэргүүдэд олзлогдсон гэж тус мужийн захиргааны орлогч дарга Кирилл Стремоусов РИА Новости агентлагт мэдээлжээ.
Херсон муж руу Украины Зэвсэгт хүчин наймдугаар сарын сүүлчээр сөрөг довтолгоо хийж эхэлсэн. ОХУ-ын Батлан хамгаалах яамны мэдээлснээр эдгээр бүх халдлагыг няцааж, Украины цэргүүд хүн хүч, техник хэрэгсэлд ихээхэн хохирол амссан.
"Хоригдлууд байгаа. Би тэднийг өөрийн биеэр харсан. Эдгээр нь Киевийн дэглэмийн траншей руу орж, улмаар амиа хорлох халдлага үйлдсэн азгүй хүмүүс" гэж Стремусов хэлжээ.
Түүний хэлснээр, Украины эрх баригчид хүн хүчний хохирлоо тоодоггүй бөгөөд наймдугаар сарын 29-нөөс хойш гурван мянга гаруй хүнээ алдсан байна.
"Бид энэ нацизмыг няцаах болно" гэж Стремусов онцлон тэмдэглэв.
Тусгай ажиллагааны үеэр Оросын арми Запорожье мужийн Азовын хэсэг болон Херсон мужийг бүхэлд нь хяналтандаа авч, Херсон, Мелитополь, Бердянск зэрэг томоохон хотуудыг эзлээд байгаа юм. Түүнчлэн Украиныг Азовын тэнгисээс таслаад байна. Хяналтдаа авсан тухайн хоёр бүс нутагт шинэ засаг захиргаа байгуулагдаж, Оросын телевиз, радио станцууд нэвтрүүлгээ цацаж, Крымтэй худалдаа, тээврийн харилцаа сэргэж байна. Орон нутгийн эрх баригчид Оросын бүрэлдэхүүнд орох төлөвлөгөөгөө зарлаад байгаа юм.
Эх сурвалж: РИА новости
