ДЭМБ-ын тэргүүн Тедрос Адханом Гебрейюс есдүгээр сарын 7-нд хийсэн хэвлэлийн бага хурлын үеэрээ "Өнгөрсөн долоо хоногт 44 секунд тутамд нэг хүн COVID-19 коронавирусын халдварын улмаас нас барсан" хэмээн мэдэгдлээ.
Гэсэн хэдий ч дэлхий даяар COVID-19-ийн улмаас нас баралтын тоо аажмаар буурч байгааг ДЭМБ-ын тэргүүн тэмдэглэв. Түүний хэлснээр, 2022 оны хоёрдугаар сараас хойш долоо хоног бүрийн нас баралтын тоо 80 хувиар буурсан байна. Үүний зэрэгцээ энэ хандлага цаашид үргэлжлэх баталгаа байхгүй гэж Гебрейюс тэмдэглэв.
Дашрамд тодотгоход энэ сарын 8-ны байдлаар дэлхий нийтэд коронавирусээр 612.1 сая хүн өвчилж, энэ өвчний улмаас 6 509 859 хүн нас баржээ. Харин сүүлийн 24 цагт шинээр 15.7 сая хүн халдвар авчээ.
Өнгөрсөн хоногт ОХУ-д COVID-19-ийн 45 мянга гаруй шинэ тохиолдол илрээд байна. Энэ тухай ОХУ-ын коронавирусын халдвартай тэмцэх шуурхай штабаас мэдээлжээ.
Харин манай урд хөршид нийтдээ 246027 хүн өвчилэ нийт нас баралт 5226 болсон. Одоо Хятадад 6261 хүн эмчлүүлж байгаа гэжээ.
Өмнө нь Эрүүл мэндийн яамны тэргүүн Михаил Мурашко хэлэхдээ, Орос улсад COVID-19-ийн өвчлөл нэмэгдэх төлөвтэй байна. Үүнтэй холбогдуулан хувийн урьдчилан сэргийлэх арга хэмжээг чангатгахыг сайд уриалсан юм.
