БШУЯ-наас багш нарын боловсролын бичиг баримт, дипломыг шалгасан талаараа мэдээлсэн. Тэгвэл энэ ажлыг үргэжлүүлэхийг иргэд болон УИХ-ын зарим гишүүд дэмжиж байгаагаа илэрхийллээ.
Тодруулбал: УИХ-ын гишүүн Ш.Раднаасэд хуурамч дипломын асуудлыг зөвхөн багш нарын хүрээнд бус аймаг, сумдын удирдлагууд болон түүний Тамгын газар, төрийн жинхэнэ албан хаагчдын дипломын асуудлыг нэг мөр шалгахыг Төрийн албаны зөвлөлд ханджээ.
Тодруулбал, 59 мянган дипломыг шалгахад, 724 диплом зөрчилтэй болох нь тогтоогдсон бол 2000 нь сэжигтэй байна гэдгийг тодотгосон. БШУЯ-д их, дээд сургууль төгсөгчдийн мэдээллийн нэгдсэн сан байдаг ч хуурамчаар диплом үйлддэг асуудал нэгэнт "сүлжээ" болтлоо даамжирсныг БШУ-ны сайд Л.Энх-Амгалан мэдээллийнхээ үеэр хэлсэн. Зөвхөн бага ангийн багш нар болон цэцэрлэгийн багш нарыг шалгахад энэ мэтчилэн зөрчил гарч байна. Тэгвэл төрийн албанд ажилладаг бүх шатны ажилчдыг шалгавал дахин хэчнээн зөрчил гарах вэ. Энэ асуудлыг энэ чигээр нь үлдээвэл ахин хэдэн боловсролын бичиг баримт, диплом хуурамчаар үйлдэгдэх нь тодорхойгүй. Тиймээс энэ ажлыг цааш нь үргэлжлүүлж нэг мөр цэгцлэх нь зөв.
Г.Бүжинлхам
