Өнөөдөр Фантастик продакшны жүжигчид мэдээлэл хийлээ. "Өргөө" кино театрын хүнд нөхцөлтэй гэрээг хүчээр тулгадаг асуудлаар мэдээлэл өгөх гэж байсан боловч бизнесийн байгууллагууд хоорондоо тохиролцсон гэдгээ илэрхийллээ.
Жүжигчин Б.Тамир: "Өргөө" кино театраас уран бүтээлчдэд хүчээр тулгадаг гэрээний талаар мэдээлэл хийнэ гэснийг зарим нь буруу ташаа ойлгосон юм шиг байна. Мэдээж бизнесийн байгууллагууд хоорондоо учраа олох ёстой. Хувь байгууллага учраас өөрсдийн сонголтоор хамтран ажилладаг болохоос хүчээр тулгадаг асуудал байхгүй гэж бодож байна. Хоёр талаасаа тохиролцож, биднийг дэмжиж ажиллахаар болсонд баяртай байна. Уран бүтээлчид сайн уран бүтээл хийхийн тулд маш их зардал гаргаж, эрсдэл үүрдэг. Үүнийг маань кино театрууд дэмжин ажиллаж байгаад баяртай байна.
Фантастик продакшны 15 дахь уран бүтээл "Зура: Цурам ажиллагаа-2" уран сайхны кино хоёр хоногийн дараа бүх кино театруудаар нээлтээ хийх гэж байна. Тус киног бүтээхэд 1 тэрбум гаруй төгрөг зарцуулсан гэж мэдээллээ. Мөн шинэ уран бүтээлийнхээ зураг авалтыг Тайланд, Солонгос, Монголд нийт 52 хоногийн зураг авалт хийсэн байна.
Г.Бүжинлхам
