ОХУ-ын Буриад улсын 200-аад хүний бүрэлдэхүүнтэй өргөн баг Улаан-Үд-Улаанбаатар чиглэлийн тусгай автобусаар Кыргызстаны нэрийн өмнөөс барилдаж буй нутгийн бөх, манайхны эчнээ танил Арсалан Будажаповыг дэмжихээр манай оронд ирээд байна. Энэхүү үйл ажиллагааг Буриадын бөхийн холбооноос зохион байгуулжээ. 2019 оноос Кыргызстан нэрийн өмнөөс барилдаж буй Арсалан хоёр жилийн өмнө Шинэ Делид болсон Азийн аваргад 79 кг-ын жинд түрүүлж байв. Тэгвэл Улаанбаатарт хошой аварга болох төлөвлөгөөтэй ирсэн ч тэрбээр түрүүлж чадаагүй бөгөөд хагас шигшээд Энэтхэгийн Бальян Гоуравт 5:8-аар ялагдсан. Харин хүрэл медалийн төлөөх барилдаанд Туркменистаны Гурбанмырат Овезбердиевийг ялж нутагт нэгтнүүдээ баярлуулав.
