Өнөөдөр Монгол Улс даяар хичээлийн шинэ жилийн нээлт эхэлж, бяцхан үрс маань эрдмийн баяраа ёс төртэй тэмдэглэх түүхэн өдөр. Монгол-Оросын хамтарсан сургууль урьдын жишгээр эрдмийн баяраа тэмдэглэж байтал өөрийгөө сэтгүүлж гэж нэрлэдэг С.Бүдрагчаа зориуд үймүүлж, эцэг эх, сурагчид, багш сурган хүмүүжүүлэгчдийг илтэд үл хүндэтгэж, хэрүүл зодоон үүсгэж, танхайрч биднийг хэл амаар доромжилж, сургууль, багш, сурган хүмүүжүүлэгчид, сургуулийн удирдлагын нэр хүндэд халдаж, гэмт хэрэгт гүтгэж байгаад гүнээ харамсаж, эрс буруушааж байна.
Монгол улс хуультай засаг төртэй улс. Хардах эрхийн дагуу иргэн хэн боловч шалгуулах зүйл байгаа бол түүнийгээ хууль хяналтын байгууллагад хандан шалгуулахын оронд зориуд үймээн дэгдээж, олон нийтийг илтэд үл хүндэтгэн, бусдын мэдэх эрхийг хангах нэрийн дор бидний үр хүүхдийн баярыг гутаан доромжилж, сэтгүүлч, хэвлэл мэдээллийн ажилтны ёс зүйг зөрчиж, сургуулийн удирдлага, Удирдах Зөвлөлийн дарга, гишүүд, ОХУ-ын ЭСЯ-ны Элчин зөвлөх болон бусад ажилтнуудыг ярилцлага өгөхийг албадан шахаж, хүч хэрэглэхийг оролдлоо.
Монгол Улс хоёр хөршийн бодлогыг улсын гадаад харилцааны гол чиг шугам болгон баримталдаг улс гэж бид ойлгодог. Гэтэл тэрхүү найрамдалт хөршийн харилцааны бэлэг тэмдэг болсон Монгол-Оросын хамтарсан сургуулийн сурагчдыг ОХУ-ын далбаа барихыг буруушаах, ОХУ-аас Монгол улсад суугаа Элчин сайдын яамны дипломат ажилтнуудыг үл хүндэтгэн үймүүлсэн бид ичиж, гүнээ харамсаж байна.
Монгол Улсын иргэн улмаар хэн ч гэсэн аливаа этгээдэд нээлттэй мэдээллээс бусад өөрт хамаатай мэдээллийг өгөх эсэхээ өөрөө шийдэх эрхтэй байтал хүүхдийн эрдмийн баяр тэмдэглэх өдрийг зориуд сонгон үймүүлж, хүчирхийлэн шахалт үзүүлж, сургууль, түүнээс боловсролын үйлчилгээ авч буй сурагчид, эцэг эхийн биед халдаж, нялх балчир үрсийг минь айлган цочоосныг бид хэзээ ч зөвтгөхгүй бөгөөд үр хүүхдийнхээ эрх ашиг, аюулгүй байдлыг хамгаалан тэмцэх болно гэдгийг хариуцлагатай мэдэгдэж байна.
Монгол-Оросын хамтарсан сургуулийн эцэг эхийн хороо
2022 оны 09 сарын 02
