Казахстаны Ерөнхийлөгч Касым-Жомарт Токаев пүрэв гарагт ард иргэддээ хандан үг хэлсэн бөгөөд энэ нь нэг цаг гаруй үргэлжилсэн байна. Төрийн тэргүүн энэхүү илгээлтдээ Ерөнхийлөгчийн болон парламентын ээлжит сонгуулийг хугацаанаас нь өмнө ээлжит бусаар зарлаж, эдийн засгийн шинэ чиглэлийн параметрүүдийг тодорхойлж, нэгдүгээр сарын үймээнд оролцогчдод өршөөл үзүүлэх саналыг тусгасан байна.
Касым-Жомарт Токаевын илгээлтийн гол онцлох ишлэлүүдийг хүргэж байна.
Ерөнхийлөгчийн засаглалаас Парламентын засаглал руу
Токаев Казахстаны улс төрийн тогтолцоог 2023 оны дунд үе хүртэл "дахин тохируулах"-ыг санал болгож, ингэхдээ Засгийн газар, Парламент, Ерөнхийлөгчийн институц гэсэн эрэмбэ дараалалтай байхаар шинэчлэхийг санал болгов. Өөрөөр хэлбэл тус улс Ерөнхийлөгчийн засаглалаас Парламентын засаглалд шилжихээр төлөвлөж байна.
Казахстанд Ерөнхийлөгчийн ээлжит бус сонгуулийг энэ намар хийхээр төлөвлөөд байна. Уг журмаараа бол 2019 оны зургадугаар сард Токаев сонгогдсоноос таван жилийн дараа буюу 2024 онд болох ёстой байсныг ийнхүү хугацааг наашлуулж байна.
Токаев "улс төрийн шинэ эрин"-ийг эхлүүлэхийн тулд Ерөнхийлөгчийн одоогийн таван жилээр хоёр удаа сонгогдож байсан бүрэн эрхийн хугацааг хязгаарлаж нэг удаа долоон жилээр сонгодог байхыг санал болгов.
Ирэх оны эхний хагаст Мажилис (парламентын доод танхим), маслихат (орон нутгийн хууль тогтоох хурал)-ын сонгуулийг мөн хугацаанаас нь өмнө явуулахаар төлөвлөж байна. Тодотгоход өмнөх сонгууль 2021 оны нэгдүгээр сард болж, эрх баригч Нур Отан буюу одоогийн Аманат нам ялалт байгуулсан юм.
Мөн эр мэдлийн "төвлөрлийг сааруулах" буюу засгийн газрын бүх сайд бүрт эрх мэдэл, хариуцлагыг шилжүүлэхийг санал болгов.
Эдийн засгийн шинэ чиглэл
Казахстаны Ерөнхийлөгч эдийн засгийн шинэ чиглэлийг тунхаглаж, төр аж ахуй эрхлэгчдийн үйл ажиллагаа, эдийн засагт хэт их хөндлөнгөөс оролцохоос татгалзахаа амлав.
Үндэсний баялгийн сангаас "Самрук-Казына"-г төрийн оролцоотой хөрөнгө оруулалтын компани болгож, үлдсэн хөрөнгийг нь хувьчлах ёстой. Харин Самрук-Казына зөвхөн хувийн хөрөнгө оруулагчид санхүүжүүлж чадахгүй чухал том төслүүдэд хөрөнгө оруулах боломжтой.
Нийгмийн бодлогын чиглэлээр
Токаев тансаг хэрэглээний татварыг нэвтрүүлэх замаар татварын тогтолцоог шинэчлэхийг санал болгож байна. Энэ нь дундаж давхаргад нөлөөлөхгүй гэж үзэж байгаа. Ерөнхийлөгч мөн хөдөлмөрийн хөлсний доод хэмжээг 60,000-аас 70,000 тенге (ойролцоогоор 420 000-490 000₮) болгон нэмэгдүүллээ.
2028 он хүртэл эмэгтэйчүүдийн тэтгэврт гарах нас нэмэгдэхгүй, - энэ нь одоогийн 61 нас гэсэн хязгаартаа хэвээр байх болно. Суурь төлбөрийн доод хэмжээг амьжиргааны доод түвшний 70 хувьд хүргэснээр дундаж тэтгэвэр 27 хувиар өснө гэж үзэж байна.
Үймээн дэгдээгчдэд өршөөл үзүүлнэ
Энэ оны нэгдүгээр сард болсон үймээний олон оролцогчид буруугаа ухаарч, хийсэн хэрэгтээ гэмшиж байна. Токаев тэдэнд нэг удаагийн өршөөл үзүүлэх бодолтой байна. Гэхдээ энэ нь үймээн самууныг зохион байгуулагчид болон эх орноосоо урвасан, эрх мэдлийг хүч хэрэглэн булаан авах хэрэгт буруутгагдаж буй хүмүүст хамаарахгүй юм.
Эх сурвалж: Итар-ТАСС
