Киев Оросын тусгай ажиллагаа дуусахаас өмнө НАТО-д элсэх боломжтой болж магадгүй гэж Тус улсын Шадар сайд Ольга Стефанишина Европын Правда сонинд өгсөн ярилцлагадаа мэдэгджээ.
"Би дэлгэрэнгүй яримааргүй байна, гэхдээ бидний НАТО-д элсэх тухай шийдвэр Оросын тусгай ажиллагаа дуусахаас ч өмнө гарч магадгүй" гэж Стефанишина хэлэв.
Киев эвсэлд элсэх хүсэлтийг олон удаа тавьж байсан бөгөөд одоо "шийдвэрийг Брюссель гаргах ёстой" гэж тэр дурсав.
Үүний зэрэгцээ зэвсэгт мөргөлдөөнд оролцож байгаа, нутаг дэвсгэрийн маргаантай улс НАТО-д элсэх боломжгүй гэсэн мэдэгдэлтэй Шадар сайд санал нийлэхгүй байна гэдгээ хэллээ.
Тодруулбал, "Энэ бол тийм биш. НАТО-гийн Ерөнхий нарийн бичгийн дарга асан Расмуссен үүнийг хэрэгжүүлэх томъёог санал болгосон" гэж тэр тодотгожээ .
Умард Атлантын эвслийн тэргүүн асан Андерс Фог Расмуссен өнгөрсөн нэгдүгээр сард хэдийгээр энэ хоёр улсын нутаг дэвсгэрийн маргаан шийдэгдээгүй байгаа ч гэсэн Украин, Гүржийг тус байгууллагад гишүүнээр элсүүлэх үйл ажиллагааны төлөвлөгөөг санал болгосон юм. Түүний үзэж байгаагаар, үүний тулд НАТО-гийн дүрмийн 5-р зүйл зөвхөн Киев, Тбилисийн хяналтанд байдаг нутаг дэвсгэрт хамаарна гэсэн тайлбар хийх шаардлагатай байгаа ажээ.
НАТО-гийн дүрмийн 5-р зүйлд "Европ эсвэл Хойд Америкт аль нэг буюу хэд хэдэн гишүүн орны эсрэг хийсэн зэвсэгт халдлагыг бүхэлд нь эвслийн эсрэг халдлага гэж үзнэ" гэж заасан байдаг.
Сануулахад өнгөрөгч 7-р сард Расмуссен Зеленскийн ажлын албаны дарга Андрей Ермактай хамт Украины аюулгүй байдлын баталгааг боловсруулах ажлын хэсгийн ахлагч болсон юм.
2014 оны 12-р сард Дээд Рада Украины эвслийн бус статусаас татгалзахыг албан ёсоор баталжээ. 2019 оны хоёрдугаар сард мөн Үндсэн хуульдаа нэмэлт өөрчлөлт оруулж, тус улсыг ЕХ болон НАТО-д элсэх чиг хандлагыг тодорхойлсон юм.
Украиныг Умард Атлантын эвсэлд элсүүлэх асуудлыг одоогоор авч үзээгүй байна гэж Вашингтон удаа дараа мэдэгдсэн. Үүний зэрэгцээ НАТО "нээлттэй хаалга"-ны бодлогоо хэзээ ч орхихгүй гэдгийг онцолсон.
Хойд Атлантын холбоо сөргөлдөөн хийх зорилготой гэдгийг Орос улс удаа дараа тэмдэглэсэн. Ерөнхийлөгчийн хэвлэлийн төлөөлөгч Дмитрий Песков хэлэхдээ, түүнийг цаашид өргөжүүлэх нь Европт илүү их аюулгүй байдлыг авчрахгүй. Үүний зэрэгцээ Швед, Финлянд улсууд НАТО-д элсэх боломжтой байгаа нь Оросын оршин тогтнохуйд аюул учруулахгүй гэж мэдэгдээд байгаа юм.
Эх сурвалж: РИА новости
