-Горбачев - Өөрчлөн байгуулалт /перестройк/ болон Ил тод байдлын /гласност/ эцэг, ЗХУ-ын анхны бөгөөд сүүлчийн ерөнхийлөгч байв-
ЗХУ-ын Ерөнхийлөгч асан Михаил Горбачев 92 насандаа таалал төгсчээ. Энэ тухай Клиникийн төв эмнэлэгт мэдэгдсэнийг РИА Новости мэдээлэв.
"Михаил Сергеевич Горбачев хүнд, удаан үргэлжилсэн өвчний дараа өнөө орой нас барсан" гэж клиникийн төв эмнэлгээс мэдээлэв.
Михаил Горбачев бөөрний өвчнөөр шаналж, гемодиализ зэрэг эмчилгээ хийлгэж байгаа гэж Горбачевын сангийн хэвлэлийн төлөөлөгч Владимир Поляков зургадугаар сард мэдэгдсэн юм. Тэрээр мөн ЗСБНХУ-ын ерөнхийлөгч асны биеийн байдал муудсаныг насжилттай холбон тайлбарлав.
1985 оны 3-р сард Михаил Горбачев ЗХУ-ын Төв Хорооны Ерөнхий нарийн бичгийн даргаар сонгогдож, таван жилийн дараа буюу 1990 оны 3-р сард ЗХУ-ын Ерөнхийлөгчөөр сонгогдсон нь ЗХУ-ын түүхэн дэх анхны бөгөөд сүүлчийнх юм.
Түүнийг дэлхий дахин өөрчлөн байгуулалтын эцэг гэдгээр нь сайн мэддэг юм.
Перестройка ба "Шинэ сэтгэлгээ"
Горбачев нам төрийн тэргүүн болсон даруйдаа шинэчлэлийн хөтөлбөрөө зарлаж, дараа нь "Перестройка" гэж нэрлэсэн юм. ЗХУ 1990 онд төрийн цензурыг халсан ил тод байдлын /гласност/-ын бодлогыг хэрэгжүүлсэн. Тэj хувийн бизнесийг хуульчилж, гадаад бодлогод "Шинэ сэтгэлгээ"-г тунхагласан юм..
Орчин үеийн хүмүүс түүний хийсэн шинэчлэлийн үр дагаврыг хоёрдмол утгатай үнэлдэг. Олон хүний үзэж байгаагаар эдгээр өөрчлөлтүүд ЗХУ задран унасны эхлэл болсон юм.
Горбачёвын гадаад бодлогод оруулсан гол гавьяаны нэг нь цөмийн зэвсгээс ангижрах эхлэлийг тавьсан бөгөөд түүний санаачилгаар Зөвлөлтийн цэргийг Афганистанаас гаргах ажил эхэлжээ.
Төмөр хөшиг нурсны бэлгэ тэмдэг болсон Берлиний ханыг нурааж, Германыг нэгтгэхэд Горбачев гол үүрэг гүйцэтгэсэн. Гэсэн хэдий ч түүний санаачилгыг барууныханд буулт хийсэн гэж зарим нэг нь үздэг юм.
Эх сурвалж: Лента.ру
