Өнөөдөр УИХ-ын чуулганы нэгдсэн хуралдаанаар ЗГ-ын шинэ гишүүд тангараг өргөлөө. Энэ үеэр УИХ-ын дарга Г.Занданшатар шинэ гишүүддээ баяр хүргээд, тулгамдсан асуудлуудаа яаралтай шийдэж шууд ажилдаа орохыг хүслээ.
УИХ-ын дарга Г.Занданшатарын шинэ гишүүддээ захисан захиасаас хүргэе.
Тэрээр: ЗГХЭГ-ын дарга Д.Амарбаясгалан танд нам засгийн үйл ажиллагааны залгамж чанарыг хангах, мөрийн хөтөлбөрийг эрчимжүүлэх, шинэ сэргэлтийн бодлогыг үр дүнд хүргэх чиглэлээр яам хоорондын ажлын уялдаа холбоо зохицуулалтыг хэрэгжүүлж бодит үр дүнд хүргэх үүрэг ногдож байна.
Улаанбаатар хотын замын төлөвлөлт, түгжрэл, агаар орчны бохирдол Монгол улсад ужгирсан асуудал болоод байна. Үндсэндээ зарим үед тэг зогсолт хийж байна. Үүнийг шийдэх шинэ гарц гаргалгаа олно гэдэгт Ж.Сүхбаатар танд итгэж байна.
УИХ –ын гишүүн Б.Бат-Эрдэнэ та бол 5 удаа сонгогдсон. Монгол төрийн дархан түшээ хүн. Иймээс эрүүл чийрэг амьдралын нөхцлийг бүрдүүлж спорт олимпизмын үйл ажиллагааг Монголд түгээн дэлгэрүүлэх ажилд томоохон хувь нэмэр оруулна гэдэгт найдаж байна.
Монгол Улсын хөгжлийн бодлого урт хугацаанд тогтвортой хөгжих нь МУ-ын ҮХ-ийн нэмэлт өөрчлөлтийн үзэл баримтлал юм. Хөгжлийн томоохон зорилтуудаа цаг алдалгүй шийдвэрлэх, иргэдийн сайн сайхан амьдрах нөхцлийг хангах, эдийн засгийн шинэ бодлогыг уялдуулах, зохицуулах хангахыг Эдийн засаг, хөгжлийн сайд Ч.Хүрэлбаатар, гишүүнээс хүсье
Зам дагаж хөгжил ирдэг нь дэлхий нийтэд нэгэнт тогтсон. Сүүлийн жилүүдэд энэ жишгийн хүрээнд Монгол Улсын бүх аймгийг авто замаар холбосон. Гэхдээ шийдэгдээгүй, иргэдийн бухимдлыг хүргэсэн цөөнгүй асуудал байгаа. Монгол улсыг дэлхийн зах зээлд хүргэх боомтын сэргэлт, бүтээн байгуулалтыг хангаж ажиллахад Зам, тээврийн хөгжлийн сайдаар сонгогдсон С.Бямбацогт танд онцгой анхаарч ажиллах шаардлагатай
Монгол улсаа олон тулгууртай эдийн засагтай болгох нь бидний нэн тэргүүний зорилт төдийгүй манай эдийн засагт хамгийн их нөлөө үзүүлэх салбар. Байгалын баялагтаа эзэн байж, үр өгөөж нь монголынхоо хөгжил дэвшилд , монгол хүний сайн сайханд зориулагдах үзэл санааг хэрэгжүүлэх нь маш том асуудал болоод байгаа. Энэ чухал үүрэг бол Уул уурхай, хүнд үйлдвэрийн сайдаар Ж.Ганбаатар танд оногдож байна.
Эрчим хүчний салбарт шийдвэл зохих тулгамдсан асуудал олон бий. Эдгээр асуудлыг нэн даруй шийдэж сэргээгдэх болон бусад эрчим хүчний эх үүсвэрийг амжилттай эзэмших чиглэлд шинэ дэвшил гаргана гэж үзэж байна. Удаашралтай байгаа олон төслүүдийг бодитой хэрэгжүүлж чадах итгэл найдварыг Эрчим хүчний сайдаар Б.Чойжилсүрэн гишүүнд даалгаж байна.
Монгол бол эрдэнэт мал сүргээр арвин үржил шимтэй өргөн уудам газар нутагтай орон. Малынхаа ашиг шимийг бүрэн дүүрэн ашиглах, малчдын хөдөмөрийн нөхцлийг сайжруулах , эрүүл хүнсээр иргэдээ хангаж улмаар экспортлогч улс болох зорилтийг үр дүнд хүргэх ажлыг Хүнс, хөдөө аж ахуй, хөнгөн үйлдвэрийн сайдаар Х.Болорчулуун танд оногдож байна.
Цахим үндэстэн болох нь бидний ойрын үеийн нэн чухал зорилтуудын нэг. Технологийн дөрөвдүгээр хувьсгалын шинэ зорилтыг залуу гишүүн Н.Учрал үр дүнд хүргэж чадна гэдэгт итгэж байна.
Халамжийг биш хөдөлмөрийг шүтдэг болгох том ажил туршлагатай парламентч Д.Сарангэрэл, танд оногдож байна.
Энэ мэтээр шинээр томилогдож байгаа сайд та бүхэнд шинэ сэргэлт хийж шинэ монголын шинэ ирээдүйн замыг тавих түүхэн чухал үүргийг хүлээлгэж байгааг ухамсарлаж ажиллахыг та бүхнээсээ хүсье” гэлээ.
Г.Бүжинлхам
