Мөрдөн байцаагчид шуурхай эрэн хайх ажиллагаа явуулсны үр дүнд сэтгүүлч Дарья Дугинагийн амийг хөнөөсөн хэргийн хамсаатны нэрийг тогтоож чадсан гэж ОХУ-ын Холбооны Аюулгүй байдлын албаны Олон нийттэй харилцах төвөөс мэдээлэв.
Мэдээлэлд дурдсанчлан, 2022 оны долдугаар сарын 30-нд Эстони улсаар дамжин ОХУ-д ирж, Дугинаг хөнөөхийн өмнөх өдөр ОХУ-ын нутаг дэвсгэрээс гарч явсан Украины иргэн 1978 онд төрсөн Цыганенко Богдан Петрович энэ гэмт хэргийн бэлтгэл ажилд оролцсоныг тогтоожээ.
Мөрдөн байцаалтын явцад Цыганенко гэмт хэргийн шууд гүйцэтгэгч Наталья Вовкийг Казахстан улсын иргэн Юлия Зайкогийн нэрээр хуурамч бичиг баримт, улсын дугаараар хангажээ. Түүнчлэн тэрбээр Вовктай хамт Москвагийн баруун өмнөд хэсэгт байрлах түрээсийн гаражид өөрсдийн бүтээсэн тэсрэх төхөөрөмжийг угсарсан байна.
Эргэн сануулахад 1979 онд төрсөн Украины иргэн Вовк Наталья Павловна 2010 онд төрсөн охин Шабан София Михайловнагийн хамт 2022 оны долдугаар сарын 23-нд ОХУ-д ирсэн болохыг ОХУ-ын ФСБ-ын мөрдөн байцаагчид өмнө нь тогтоогоод буй. Аллага болсон өдөр Вовк, Шабан нар Дарья Дугинагийн хүндэт зочноор оролцож байсан утга зохиол, хөгжмийн «Традиция» наадамд очсон байдаг. 8-р сарын 21-ны орой Дугинагийн жолоодож явсан Toyota Land Cruiser Prado маркийн автомашин дэлбэрсний дараа Вовк охиныхоо хамт Псков мужаар дамжин Эстони руу явсаныг ХАБА мэдээлсэн юм.
Эх сурвалж: Interaffairs.ru
