Ховд аймгийн Иргэдийн төлөөлөгчдийн хурлын найм дахь удаагийн хуралдаан өнөөдөр үргэлжилж, Засаг даргаа сонгосон.
Ховд аймгийн Засаг даргад тус аймгийн Засаг даргын орлогч Т.Дэлгэрсайхан, Ерөнхий сайдын ахлах зөвлөх бөгөөд Ажлын албаны дарга Э.Болормаа нэр дэвшснээс нэр дэвшигч Т.Дэлгэрсайхан нэрээ татсан. Улмаар төлөөлөгчид ил санал хурааж, Э.Болормааг 73.1 хувийн саналаар дэмжсэн юм.
Тэгвэл Ховд аймгийн Засаг даргаар сонгогдсон Э.Болормаагийн хөрөнгө орлогын мэдүүлгийг хүргэж байна. Түүний жилийн орлого нь 96 сая төгрөг бөгөөд 2.1 тэрбум төгрөгийн үнэ бүхий хоёр орон сууц, нэг оффис, нэг өвөлжөөтэй аж.
Машингүй, мал аж ахуй болон газар тариалан эрхэлдэггүй, 30 сая төгрөгөөр үнэлэгдэх урлаг, түүхийн үнэт эдлэлтэй. Дотоодод 164 сая төгрөг, гадаадад 510 саяын хадгаламжтай бол 1.1 тэрбум төгрөгийн зээл, 20 сая төгрөгийн авлагатай гэж 2021 онд АТГ-т мэдүүлж байжээ.
