"Помпейн Сүйрэл" гэдэг кино байдаг даа. Аймшигтай Помпейн уулс дэлбэрэх гээд байхад ард иргэд нь найрлаад л боолуудын цуст тулаан үзээд байдаг даа. Гэтэл Помпейн уул галт могой шиг тургиж тэр хот сэхээрч амжаагүй байхад л халуун лав гол шиг урсаж үнс нурам болдог доо. Саяхан Улаанбаатар хот түгжрэлд өртөж хаашаа ч зугтаах аргагүй болж тэрхүү галт уулыг санагдуулна. Таван цаг үргэлжилсэн түгжрэл Хотын дарга Сумьяабазарт сануулга өгч тэгш сондгойгоор нь явах шийдвэр гарахад хүрчээ. Амь аргацаасан, өдөр өнгөрөөсөн шийдвэр бөгөөд түгжрэл хэвээрээ л байх болно. Буруу шийдвэр муу үр дагавартай бөгөөд иргэд зургаан машинтай, олон номертой ч болох юм. Хотын дарга дүүжин гүүр, усан зам, метро ч гэх шиг бүтэхгүй зүйл ярьсаар дахиад дөрвөн жилийг авах нь дээ. МАН ялах бүртээ "Хотын түгжрэл бууруулна" гэж амлалт өгч нэг ёсны залилан хийх юм даа. Түгжрэл бол метрополис хот болгонд тохиолддог бэрхшээл. Хоньчин Ц.Намхайнямбуу "Бэрхшээл хүнд ялагдах гэж ирдэг" гэсэн байдаг. Түүнтэй адилхан шийдлээ хүлээсэн бэрхшээл шүү дээ. Дэлхий дээр түгжрэл шийддэг түмэн арга байсаар байтал нэгийг ашиглалгүй дахиад нэг өвөлтэй золголоо. Ёстой тавилан юм даа.
