УИХ дахь МАН-ын бүлэг 10 цагаас хуралдаж, сайд нарын нэрийг эцэслэх бололтой. Өнгөрсөн өдрүүдэд Ерөнхий сайд, МАН-ын дарга Л.Оюун-Эрдэнэ Ерөнхийлөгч, УИХ-ын даргатай зөвлөлдсөн бөгөөд МАН-ын Удирдах зөвлөлийн хурлаар шинэ сайд нарынхаа нэрийг өнөөдөр оруулж батлуулна. Ингээд бүлгээр хэлэлцэж, УИХ-аар эцэслэнэ.
Үндсэн хуульд 2019 онд оруулсан нэмэлт өөрчлөлтөөр Засгийн газрын тэргүүнд сайд нараа огцруулах, томилох эрх өгсөн. Мөн УИХ-ын гишүүдээс сайд нараар ажиллах боломжийг хязгаарласан. Энэ дагуу УИХ-д сайд нар тангараг өргөдөг болохоос УИХ-аас томилолт өвөртлөхгүй болсон учраас УИХ-ын хэдэн гишүүний халаасыг түнтийлгэх гэж хичээх шаардлагагүй боллоо хэмээх ойлголт иргэдэд өгч байв. Гэтэл хууль бодит амьдрал дээр хэрэгжээд эхэлсэн чинь МАН-аас сонгогдсон УИХ-ын гишүүдэд таалагдаагүй. Тиймээс гурван жил ч бололгүй Үндсэн хуульд оруулсан нэмэлт өөрчлөлтийг Үндсэн хуулийн цэцийн шийдвэрээр хүчингүй болгуулж чадсан.
Ийнхүү Үндсэн хуулийн Цэцийн 02 тоот тогтоол гарсантай холбогдуулан Үндсэн хуулийн 39.1 буюу Засгийн газрын 4-өөс илүүгүй сайд УИХ-ын гишүүн байх заалт хүчингүй болсноор УИХ-ын ээлжит бус чуулган хуралдаад буй. Чуулган зарлан хуралдуулах болсон гол шалтгаан нь МАН Үндсэн хуульд нэмэлт өөрчлөлт оруулах байсан нь тодорхой. Өнгөрсөн өдрүүдэд Үндсэн хуульд ер нь бусад хуульд ч нэмэлт өөрчлөлт оруулах нь нэгээс хоёр өдрийн л ажил болжээ гэдгийг хэн хүнгүй харсан. Мөн Засгийн газрын бүрэлдэхүүнийг хэрхэн нааш цааш хөдөлгөх тухай бишгүй таамаг хөвөрлөө. Ерөнхийлөгч, Ерөнхий сайд, МАН-ын ерөнхий нарийн бичгийн дарга гурав Засгийн газрын сайд нарын суудлыг хуваан өөр өөрийн хүмүүсээ томилно гэх ч дуулдав. МАН бол хамтын шийдвэр гаргадаг, ардчиллын үндсэн зарчмыг дээдэлдэг улстөрийн хүчин хэмээн МАН-ын удирдлагууд “бурдаг” ч бодит байдал дээр Засгийн газраа бялууны зүсэм шиг хувааж суугааг хэрхэн тайлбарлах билээ.
Хамгийн хачирхалтай нь, МАН Засгийн газартай АН-ын урьсан гэх мэссэж. МАН-ын дарга Л.Оюун-Эрдэнэ “Ямбыг нь эдэлсэн бол ялыг үүр” хэмээн бусдад тулгадаг “алдарт үг” нь ийн өөрийнх нь нуруун дээр ирэхээр “Ямбыг нь бид эдэлье, Ялыг нь хамтдаа үүрье” болж хувирсан бололтой.
Үүнийгээ “Хүчээ нэгтгэе” дээ АН, ХҮН-ыг урьсан хэмээн “ХЭРО” пиараар халхавчлах нь тодорхой. Харин АН УИХ-д дөнгөж бүлэг үүсгэх төдий суудалтай, дотроо хагаралтай гэх зэрэг эмзэг байгаа учраас дуртайяа хүлээж авах уу.
АН-ын хувьд хэд хэдэн удаа хамтарсан Засгийн газарт ажилласан. Гэвч тухайн үед хөгжлийн төлөө намууд хамтарч үнэхээр ажиллаж чадсан уу. “ Шуудайд хийсэн үхрийн эвэр гэгчээр Ерөнхий сайд нь нэг өөр яриад, Шадар сайд нь ахиад өөр зүйл яриад, Засгийн газрын ажилд Ерөнхийлөгч хутгалдаад ямархуу байдалтай ажилласан билээ...
Тиймээс ард түмэн МАН-ыг ямбыг нь эдлүүлсэн шиг эдлүүлээд ялыг нь үүрүүлсэн шиг үүрүүлье гээд УИХ-д үнэмлэхүй болгож сонгосон. МАН-ын дарга Л.Оюун-Эрдэнэ үүнийг хамгийн сайн мэдэж байгаа хүн. Л.Оюун-Эрдэнэ сайд аа, “Ямбыг нь эдэлсэн шигээ ялыг нь ч үүр”. Инфляцыг гадаад хүчин зүйл рүү түлхэж болох ч ард түмний МАН-д үзүүлсэн итгэлийг АН, ХҮН рүү түлхэж болохгүй биз дээ.
