-Хакерууд орчин үеийн зэвсгийн талаарх мэдээлэл бүхий НАТО-гийн цэргийн нууц баримт бичгүүдийг интернетээр зарж байгаа тухай BBC мэдээлэв.-
Интернетэд тавигдсан тэрхүү нууц материалууд нь НАТО-гийн цэргийн хүчний Балтийн орнууд дахь шинэ зэвсэг, хэрэглэл болон маневруудын талаарх мэдээллийг агуулж байгаа аж. НАТО одоогоор алдагдсан нууц мэдээллүүдийнхээ хэмжээ, цар хүрээг үнэлж, түүний болзошгүй үр дагаврыг урьдчилан таамаглахаар ажиллаж байна.
BBC-ийн мэдээлснээр халдлага үйлдэгч хакерууд Европын томоохон зэвсэг үйлдвэрлэгч болох Францад төв штаб нь байрладаг MBDA Missile Systems компанитай холбоотой файлуудад нэвтэрч чадсан байна. Тус компани мэдээллийг хатуу дискнээс хулгайлсан гэж мэдэгджээ.
Өнгөрсөн долдугаар сард Оросын хакерын бүлэглэл Killnet АНУ-ын Холбооны Татвар Төлбөрийн Системийн вэб сайт руу халдсан юм. Халдлагын улмаас сайтыг таван цагийн турш хэрэглэгчид ашиглах боломжгүй болсон гэж Killnet-ийн төлөөлөгчид мэдэгдэж байв.
