Украины Ерөнхийлөгч Владимир Зеленский болон Украины Зэвсэгт хүчний ерөнхий командлагч Валерий Залужный нарын хооронд ноцтой зөрчилдөөн үүсч, тэдний хэн нэг нь огцорсноор дуусч магадгүй гэж барууны хэвлэлүүд мэдээлжээ. Энэ тухай РИА Новости Германы "Bild" сониноос иш татан мэдээлэв.
Тус сонинд бичсэнээр Зеленский ерөнхий командлагчийнхаа ерөнхийлөгчийн амбицын тухай цуурхалд маш их бухимдаж байгаа аж. Дайн байлдаан дууссаны дараа генерал ерөнхийлөгч болох боломжтой. Үүний зэрэгцээ тус сонин Залужныйгийн манлайлах чанар, цэргийн авьяас чадварын тухай тодотгож бичжээ.
Гэвч Украины хэвлэлүүд энэ оны есдүгээр сарын эхээр Залужныйг Батлан хамгаалах яамны тэргүүнээр томилно гэж таамаглаж байгаа юм. Зеленский түүнийг албан тушаал дэвшүүлэх боловч үнэн хэрэгтээ армийн удирдлагаас холдуулах нь нийгэм дэх нэр хүндийн өсөлтийг нь сааруулна гэсэн тооцоо байж болно.
Тус улсын хуурай замын цэргийн командлагч Александр Сирский Украины Зэвсэгт хүчний ерөнхий командлагчийн албан тушаалд нэр дэвшиж байгааг тэмдэглэжээ. Үүнээс өмнө тэрбээр Донбасс дахь үйл ажиллагааг зохицуулдаг Украины Зэвсэгт хүчний нэгдсэн штабыг удирдаж байсан юм. Нэмж дурдахад тэрээр тус бүс нутагт терроризмын эсрэг ажиллагааг удирддаг.
Залужныйтай зэрэгцэн яригдаж байгаа өөр нэг хувилбар бол Тагнуулын ерөнхий газрын дарга Кирилл Буданов юм. Тэрээр 35 настайдаа бригадын генерал, 36 настайгаасаа хошууч генерал цолоор шагнагдаж байв. Саяхан Будановт Украины ерөнхийлөгчийн дэргэдэх тагнуулын хорооны удирдлагыг даатгажээ. Крымд хийсэн хорлон сүйтгэх ажиллагааны ард түүнийг байгаа гэсэн таамаглал байдаг.
“Зеленский баруунаас бүрэн хамааралтай. Одоогийн байдлаар тэд Украинд болж буй үйл явдалд сэтгэл хангалуун байгаа бөгөөд төрийн тэргүүнийг огцруулах гэж яарахгүй байгаа ч нөхцөл байдал өөрчлөгдөхөд тэд хамгийн түрүүнд Залужныйг санах болно" гэж улс төр судлаач Александр Дудчак хэлэв.
8-р сарын 11-нд Украины Ерөнхийлөгчийн Тамгын газрын даргын зөвлөх Алексей Арестович Зеленскийг төрийн тэргүүнээс өөрчлөхөд бэлэн байгаа мэдэгдэж байв. Хэрэв Украины одоогийн удирдагч хоёр дахь удаагаа нэр дэвшихгүй бол улстөрч ерөнхийлөгчийн сонгуульд өрсөлдөхөд бэлэн байна гэжээ.
Тодотгоход, Залужный 2022 оны Украины хамгийн нөлөө бүхий хүнээр нэрлэгдэж байгаа бөгөөд түүнийг "Төмөр генерал", "Түүхэн хүн"гэхчлэн тодтотгож байна.
Эх сурвалж: Лена.ру
