МАН-ын Удирдах зөвлөлөөс Ховд аймгийн Засаг даргад Ерөнхий сайдын ахлах зөвлөх Э.Болормааг нэр дэвшүүлсэн нь олны анхаарлыг татаж байна. Ховд аймгийн ИТХ-ын наймдугаар хуралдаан өнөөдөр болж, Ховд аймгийн Засаг даргыг сонгох эсэх асуудлыг хэлэлцэж эхэллээ. Ховд аймгийн ИТХ-ын төлөөлөгчдийн зүгээс “Нутгийн өөрөө удирдах байгууллагын эрх мэдэлд МАН хэтэрхий оролцож байна” гэх шүүмжлэл гараад буй. Харин ИТХ дахь АН-ын төлөөлөгчдийн зүгээс Засаг дарга бүрэн эрхийнхээ хугацаанд бүрэн ажиллаж чадахгүй нөхцөл байдал сүүлийн жилүүдэд үүсээд байна. Тиймээс аль болох засаглал бүрэн эрхийнхээ хугацаанд тогтвортой ажиллуулах нь чухал байна. Засаг даргын үйл ажиллагаанд ИТХ-ын төлөөлөгчид хяналт тавьдаг, хариуцлага тооцдог, огцруулдаг, сонгодог зарчмаараа ажилламаар байна. Шууд Ерөнхий сайд оролцох буруу жишиг тогтох нь” гэх зэргээр үзэл бодлоо илэрхийлж байгаа юм.
Хурлын үеэр Ховд аймгийн ИТХ-ын төлөөлөгч н.Ганбат Ховд аймгийн Засаг даргын орлогчоор ажиллаж буй Т.Дэлгэрсайханыг нэр дэвшүүлэх санал гаргав. Тэрбээр “МАН-ын Удирдах зөвлөлийн шийдвэрийг эсэргүүцсэн зүйл байхгүй. Боловсролтой эмэгтэйг нэр дэвшүүлснийг хүлээн зөвшөөрч байна. Гэхдээ төлөөллийн зарчмаа хангаад би Т.Дэлгэрсайханыг дэмжээд нэр дэвшүүлж байна” гэв.
ИТХ дахь МАН-ын бүлгийн дарга М.Ганзориг нэг цагийн завсарлага авах санал гаргаснаар одоогоор түр завсарлаад байна.
Ховд аймгийн хувьд энэ жил бүхэлдээ гандуу байсан учраас өвөлжилт хүндрэх төлөвтэй байгаа бөгөөд цаашид Эрдэнэбүрэнгийн цахилгаан станц гэх мэт томоохон бүтээн байгуулалтын ажлууд хүлээгдэж байгаа юм.
Эх сурвалж: khovd.mn
