Монгол Улсын Их Хурлын гишүүн Н.Энхболд нарын 62 гишүүнээс УИХ-д өргөн мэдүүлсэн Монгол Улсын Үндсэн хуульд оруулах өөрчлөлтийн төслийн нэг дэх хэлэлцүүлгийг хийж, олонхийн буюу 96.8 хувийн саналтайгаар дэмжигдэж баталсан үйл явдал өчигдөр боллоо.
Ингэснээр УИХ-ын дарга Г.Занданшатар Монгол Улсын Үндсэн хуульд оруулсан нэмэлт, өөрчлөлтийг Монгол Улсын Ерөнхийлөгчид биечлэн танилцуулах ёстой. Харин Монгол Улсын Ерөнхийлөгч У.Хүрэлсүх Үндсэн хуулийн нэмэлт, өөрчлөлттэй танилцсанаас хойш ажлын гурван өдрийн дотор гарын үсэг зурж, тамгалан баталгаажуулах хуулийн зохицуулалт бий.
Монгол Улсын Ерөнхийлөгч У.Хүрэлсүх Үндсэн хуулийн нэмэлт, өөрчлөлтийг хүлээж авсныхаа дараа шууд л ёсчилох уу дараа нь ёсчлох уу гэдэг олны анхаарлыг татаад байна. Үндсэн хуулийн нэмэлт, өөрчлөлт албан ёсоор Ерөнхийлөгч ёсчилсноор эрх баригчид Засгийн газартаа өөрчлөлт оруулах боломжтой болох учраас давхар дээл өмсөх гэсэн эрх баригчдын хөл хөдөлгөөн нэмэгдэж, намын фракциуд нь идэвхжиж эхэлсэн нь тодорхой.
Д.Тогтохсүрэн Хэрэг эрхлэх, Ж.Мөнхбат шадар сайдаар сонгогдох уу?
Л.Оюун-Эрдэнийн танхимд үлдэх сайдаар Б.Жавхлан, Х.Нямбаатар, Л.Энх-Амгалан нар үлдэж, мөн зарим нэг дан дээлтэй сайд нар үлдэх сурагтай. Ялангуяа Ерөнхийлөгчийн дэмжлэг авсан сайд нар үлдэж магадгүй байна. МАН-ын дарга Л.Оюун-Эрдэнэ бүлгийн хурал дээрээ Ерөнхийлөгчтэй тохиролцсон гэдгээ хэлсэн. Тиймээс Ерөнхийлөгчийн хүссэнээр 1-2 дан дээлтэй сайд үлдэх магадлалтай гэнэ..
Хамгийн сүүлийн мэдээллээр УИХ-ын гишүүн Ж.Мөнхбат, Д.Тогтохсүрэн, Г.Тэмүүлэн, Х.Болорчулуун, Ч.Хүрэлбаатар, Б.Чойжилсүрэн, Ц.Мөнх-Оргил, Ж.Ганбаатар, М.Оюунчимэг, Д.Сарангэрэл, Б.Саранчимэг нар сайд болох тохироогоо хийсээр байна.
МАН-ын бүлгийн дарга Д.Тогтохсүрэн хоёр дахь удаагаа УИХ-д сонгогдсон. Түүнийг Засгийн газрын Хэрэг эрхлэх газрын даргаар томилж магадгүй байна. Харин УИХ-ын гишүүн Ж.Мөнхбат Шадар сайдад, Уул уурхай, хүнд үйлдвэрийн сайдад Г.Тэмүүлэн, Б.Чойжилсүрэн, Эдийн засгийн хөгжлийн сайдад Ч.Хүрэлбаатар, Хүнс, хөдөө аж ахуй хөнгөн үйлдвэрийн сайдад Х.Болорчулуун, Ж.Ганбаатар, Эрчим хүчний сайдад Ч.Анандбазар, Гадаад харилцааны сайдад Ц.Мөнх-Оргил, Эрүүл мэнд, Байгаль орчны сайдад харин эмэгтэй гишүүдийн нэрс яригдаж байна.
УИХ дахь эмэгтэй гишүүдийн 30 хувийг Засгийн газрын сайд нараар томилох уу?
МАН-ын дүрмийн дагуу аливаа томилгоонд эмэгтэйчүүдийн квотыг 30 хувьд барих ёстой гэсэн зарчимтай. Энэ ч утгаараа УИХ дахь эмэгтэй гишүүд өчигдөр намын дарга, Ерөнхий сайд Л.Оюун-Эрдэнэтэй уулзжээ. Тэдний зүгээс эмэгтэйчүүдийн 30 хувийг квотоо Засгийн газрын сайд нарын томилгоондоо хангаж ажиллахыг хүссэн байна. Ерөнхий сайд ч анхаарна гэжээ. Хэрэв Засгийн газрын сайд нарын 30 хувь гэвэл 5-6 сайд нь эмэгтэй байх шаардлагатай.
Хэрэв одоогийн Засгийн газрын дан дээлтэй гурван эмэгтэй сайдын хоёрыг нь явуулбал УИХ-аас хоёр эмэгтэй гишүүн сайд болно гэсэн таамаглал бий. Гэхдээ Ерөнхий сайд Л.Оюун-Эрдэнийн хувьд Соёлын сайд Ч.Номинг үлдээхийг хүсч буй. Харин Ерөнхийлөгч, МАН-ын генсек Д.Амарбаясгалан нарын хувьд Нийгмийн хамгааллын сайд А.Ариунзаяа, Гадаад харилцааны сайд Б.Батцэцэг нарыг явуулахыг хүсэхгүй байгаа.
Энэ мэтчилэн хэн хэн сайд болох, хэн гэдэг сайд албандаа үлдэх нь улс төрийн халуун сэдэв хэвээр байна.
Г.Бүжинлхам
