"Оюу Толгой" компанийн 66 хувийг эзэмшигч “Туркойз Хилл Ресурс” компанийн жижиг хувьцаа эзэмшигчдийн 49 хувийн хувьцааг худалдаж авах саналаа “Рио Тинто” ахиад тавилаа. Өнгөрсөн гуравдугаар сард жижиг хувьцаа эзэмшигчдэд “Рио Тинто” нэгж хувьцааг нь 26,6 ам.доллараар худалдаж авахаар 2,7 тэрбум ам.доллар санал болгоход хөрөнгө оруулагчдын зүгээс “доромжлол” хэмээн үзэж буйгаа илэрхийлж байсан. Тэгвэл өнгөрсөн долоо хоногийн лхагва гарагт "Рио Тинто" нэгж хувьцааг нь 30.79 ам.доллараар үнэлж, 3,1 тэрбум ам.долларын санал тавилаа.
“Financial Times”-ийн мэдээлснээр "Рио Тинто"-гийн хувьд ирээдүйд дэлхий нийтээр сонгоод буй ногоон эдийн засагт Оюутолгойн төсөл амин чухал гэж үзэж буй юм.
“Рио Тинто”-гийн Гүйцэтгэх захирал Якоб Стаусхольм “ Бидний санал "Туркойз Хилл” компанийн жижиг хувьцаа эзэмшигчдийн хувьцааны бодит үнэ цэнийг хангаад зогсохгүй Оюу Толгой төслийг урагшлуулахын төлөөх оролцогч талуудын ашиг сонирхолд нийцэж байна” гэж хэлсэн байна. Лхагва гарагт хийсэн энэ мэдэгдлийн дараа "Туркойз Хилл" компанийн хувьцааны ханш 21 хувиар өссөн бол "Рио Тинто"-гийнх 2 хувиар унасан байна. "Рио Тинто" нь “Туркойз Хилл Ресурс” компанийн 51 хувийг эзэмшиж, Оюу толгой төслийн менежментийн хэрэгжүүлдэг. Харин "Туркойз Хилл" бол Оюу Толгойн 66 хувийг, Монголын Засгийн газар 34 хувийг эзэмшдэг. Оюу Толгой төслөөс олборлох зэс нь цахилгаан машин болон сэргээгдэх эрчим хүчний төслүүдэд асар ихээр ашиглагддаг. Тиймээс эрчим хүчний шилжилтэд чухал металл болсон зэсгийн хамгийн том ордуудын нэг. Гүний уурхай ашиглалтад орсноор дэлхийн зэсийн хамгийн том уурхайн нэг болох юм гэж “Financial Times” мэдээлжээ.
