Ардчилсан намын удирдлагууд цаг үеийн асуудлаар мэдээлэл хийж байна.
АН-ын Ерөнхий нарийн бичгийн дарга Ч.Өнөрбаяр: Манай улс хуульгүй болсныг баталсан үйл явдал өчигдөр боллоо. Эрх баригчид Үндсэн хууль дээгүүр алхлаа.
Үндсэн хуулийн цэцийн 02 дугаар тогтоол эмх замбараагүй байдал үүсгэнэ. Яагаад заавал УИХ-ын гишүүн сэтэртэй хүнийг сайд болох гээд байна вэ? УИХ хууль тогтоогоод байна уу Засгийн газар хууль батлаад байна уу гэх асуудал үүссэн. Иймд Засгийн газрын дөрвөн гишүүн л УИХ-ын үүргийг хавсран гүйцэтгэнэ гэж хуульд оруулсан. Манай улсад сайд цөөдөөгүй. Хотын даргыг сайд болгох шаардлагагүй.
Манай намд иргэд, бизнес эрхлэгчдээс авлигатай холбоотой гомдол их ирдэг. Авлига МАН дотор бий.
АН-ын Эдийн засаг хариуцсан дэд дарга Ч.Отгочулуу: Инфляц 15.7 хувь болж өмнөх сараас ялимгүй буужээ. Үүнд юу нөлөөлөв? Татварын орлого өссөн байна. Аргагүй юм. Учир нь үнэ өссөн тул бидний төлдөг НӨАТ-ын хэмжээ ихээхэн өссөн. Бид жилийн өмнө 1000 төгрөгийн талх авдаг байсан бол одоо 2000 төгрөгөөр худалдаж авч байгаа тул НӨАТ өссөн. Түүнээс бидний орлого өссөнөөс татварын нийт дүн өсөөгүй. Гадаад өр өндөр хэвээр байна. Засгийн газар дансны аргаар гадаад өрөө буурсан мэтээр мэдээлж, дахин зээл авахаар төлөвлөж байна.
АН-ын Хууль зүй хариуцсан нарийн бичгийн дарга О.Баасанхүү: Шинэчлэлийн биш шившгийн Засгийн газартай боллоо. Эдийн засаг хүнд байна. Нийгэм, улс төрийн нөхцөл ч ихээхэн хүндэрлээ. Сайд болохоор гишүүд гүйлдэж эхлэв. Хотын даргад бүрэн эрх нь бий ч хотын дарга бодит арга хэмжээ авахгүй байна. Та сайд болох мөрөөдлөө орхин, ажлаа хийнэ үү. Гараажууд буулгасан нь харин сайн ажил болсон.
Арван их наяд төгрөгийн хөтөлбөрийн тайлан одоо ч гараагүй байна. Бидэнд дэлгэрэнгүй мэдээлэл алга. Өчигдөр МСҮТ-ийн оюутнуудын нэрээр 2.3 тэрбум төгрөг завших гэж байсныг зогсоосон талаар Л.Энх-Амгалан сайд мэдээлэв. Маш харамсалтай. МСҮТ-үүдэд орлого багатай иргэдийн хүүхдүүд сурдаг шүү дээ. Харин МАН-ын даргын хүүхэд 120 мянган ам.доллараар сургуульд сурч байна гэв.
