УИХ-аас Кино урлагийг дэмжих тухай хуулийг 2021 онд эцэслэн баталсан байдаг. Тус хуулийн дагуу “Кино урлагийн зөвлөл” байгуулагдахаар тусгагдсан. Ингэхдээ “Кино урлагийн зөвлөл орон тооны бус 10 гишүүн, нэг даргатай байна. Дарга болон гурван гишүүн нь төрийн албан хаагч байна. Үлдсэн долоо нь киноны чиглэлийн төрийн бус байгууллага, уран бүтээлчдээс бүрдэнэ” гэж заажээ.
Хуульд заасны дагуу зөвлөлийн даргыг Соёлын сайд томилох бөгөөд жүжигчин Ч.Ундрал Кино зөвлөлийн даргаар томилогдоод буй. Харин зөвлөлийн гишүүдээр хэн сонгогдох нь анхаарал татсаар. Товчхондоо зөвлөлийн гишүүд энэ хуулийн ирээдүйг шийднэ гэж ойлгож болно.
Тэгвэл гишүүдийн нэрс эхнээсээ тодорч найруулагч, кино зохиолч Н.Уранчимэг, “Боролдой” студийн захирал С.Мягмар ,СУИС-ийн Радио телевиз, медиа урлагийн сургуулийн багш, кино найруулагч Б.Түмэн-Өлзий, СУИС-ийн багш, доктор, профессор Д.Батсайхан, Кино урлагийн дээд сургуулийн багш, найруулагч Т.Төмөр-Очир нар сонгогджээ. Олон жил маргаан дагуулж, хэлэлцэн батлагдсан шинэ хуулийн замыг эдгээр хүмүүс зурахаар тодорсон аж.
Манай улсын кино урлагийн салбар сүүлийн жилүүдэд чамгүй амжилттай хөгжиж, олон улсын кино наадмуудаас ганзага дүүрэн ирэх болсон. Хамгийн сүүлийн жишээ гэвэл “Трио” киног дурдаж болно. Харин киночдын маань босгыг тогтоох зөвлөлийн гишүүд хэрхэн ажиллах, бас хэр ажиллах нь хүлээлт үүсгэж байна.
Хуулийн дагуу “Зөвлөл ажлын албатай байх бөгөөд өөрийн үйл ажиллагаа, төсвийн хөрөнгө, бусад орлогоос санхүүжнэ” гэж заасан байдаг. Төсвөөс хөрөнгө хувааж, төрийн өмнө ажлаа тайлагнах албан институт бүрд ачааны их ирдэг гэлцдэг. Юутай ч харж бас ажиглаж суух л үлдэж байна.
Н.Элбэгжаргал
Эх сурвалж: Erennews.mn
