ХХААХҮ-ийн сайд З.Мэндсайхан Засгийн газрын хуралдаанаар танилцуулсан махны экспорт болон намрын ургац хураалтын ажлын тухай мэдээлэл хийж байна.
Тэрээр өнгөрсөн зургаадугаар сарын 8-ны өдөр Засгийн газар Монгол Улс дулааны аргаар боловсруулсан махны экспортыг түр хугацаанд зогсоогоод байсан бол одоо экспортын эрхтэй 16 ААН-ийн 10 мянга орчим тонн махыг экспортоор гаргахаар болсон тухай мэдээллээ. Цаашдаа экспортод ямар нэг хориг тавихгүй, хүнсний аюулгүй байдлыг хангах гол шаардлага тавьж ажиллана гэв.
Ургац хураалтын талаар "Балансаас харахад улаанбуудай, төмсний хэрэгцээг 100 хувь, хүнсний ногооны 70 орчим хувийг дотоодын ургацаас хангах боломж бүрдэхээр байна.
Энэ оны ургацын урьдчилсан балансаар
- 441 мянган тн улаанбуудай,
- 234 мянган тн төмс,
- 126 мянган тн хүнсний ногоо,
- 56 мянган тн тосны ургамал,
- 104 мянган тн малын тэжээлийн ургамал тус тус хураан авах төлөв гарлаа. Засгийн газраас авч хэрэгжүүлж буй бодлого шийдвэрийн үр дүнд хүнсний ногооны тариалалт энэ жил 1500 га-гаар нэмэгдсэн.
ХХААХҮ-ийн сайд З.Мэндсайхан "Монгол Улс дотооддоо улаанбуудай, төмсний хэрэгцээгээ 100 хувь хангах боломж бүрдсэн. Энэ жил 31 томоохон байршилд хүнсний ногооны худалдаа зохион байгуулна. " гэв.
Мөн "Цаг агаарын урьдчилсан мэдээгээр наймдугаар сарын сүүлч, есдүгээр сарын дунд 10 хоногийн эцсээр тариалангийн бүс нутгаар хур тунадас, нойтон цас орж цочир хүйтрэх төлөвтэй байна. Иймд ургац хураалтын бэлтгэл ажлыг шуурхай ханган ажиллаж байна" гэж мэдээллээ.
