Засгийн газар төсвийн тодотголыг өргөн барихаасаа өмнө "Төрийн байгууллага, газрын тос болон уул уурхайн чиглэлийн аж ахуйн нэгж байгууллагаас бусад аж ахуйн нэгжүүдэд ажиллаж буй ажилтны өөрийнх нь төлсөн НДШ-ийн 50 хувийг ирэх тавдугаар сараас он дуустал сар бүр төрөөс буцаан олгоно" хэмээн мэдэгдэж байлаа. Гэвч төслөө өргөн барихдаа энэ зарчмаа өөрчилжээ. Энэ талаар Хөдөлмөр, нийгмийн хамгааллын сайд А.Ариунзаяа мэдээлэл өглөө.
Тэрээр "НДШ-ын буцаан олголтод 150 тэрбум төгрөг зарцуулна. Энэ мөнгө Нийгмийн даатгалын сангаас гарахгүй. Улсын төсвөөс гарна. Нийгмийн даатгалын сангийн орлого, зарлага дээр ямар нэгэн нөлөө үзүүлэхгүй. 2021 оны эцсийн цалингийн сан дээр хийсэн тооцооллоор нийт 861 мянган хүн нэг сая болон түүнээс доош төгрөгийн цалинтай байна. Энэ нь нийт нийгмийн даатгал төлөгчдийн 70 хувь. Анх танилцуулж байсан төрийн байгууллага, газрын тос болон уул уурхайн чиглэлийн аж ахуйн нэгж байгууллагаас бусад аж ахуйн нэгжүүдэд ажиллаж буй ажилтны өөрийнх нь төлсөн НДШ-ийн 50 хувийг буцаан олгох зарчмаа өөрчилсөн. Яагаад гэвэл, иргэд болон үйлдвэрчний эвлэлийн байгууллагуудаас олон өргөдөл, гомдол ирсэн. Тиймээс байгууллагын хэлбэрээр нь ялгаварлахгүйгээр нэг сая болон түүнээс доош цалинтай даатгуулагчдад өөрийнх нь төлсөн НДТ-ийн 50 хувийг буцаан олгох нь зүйтэй юм байна гэж үзсэн" гэлээ.
