Боловсрол шинжлэх ухааны яам боловсролын салбарт хийгдэж буй ажлуудаа танилцуулж, нийгэмд тэсрэлт хийв. Энэ нь дээд боловсрол олгодог 13 байгууллагын тусгай зөвшөөрлийг цуцалж, 8 их дээд сургуулийг бусад сургуультай нэгтгэсэн явдал байлаа. Түүнчлэн 24 их сургуульд зургаан сарын хугацаатай үүрэг өгсөн, шаардлага хангаагүй тохиолдолд үйл ажиллагааг зогсооно гэж мэдэгдээд байгаа юм.
Үүнтэй холбогдуулан тоо бодъё
Тоо баримтаас харвал энэ жил манай улсад 147 мянган оюутан 67 их дээд сургуульд суралцана гэх тооцоо бий. Түүнээс 108 мянган оюутан 14 их сургуульд суралцдаг. Үлдсэн 39000 оюутан татан буугдсан их, дээд сургуулиудыг хасаад 53 сургуульд суралцана гэсэн үг. Нэг сургуульд дунджаар 735 оюутан ногдож байна.
Тэгвэл 750 оюутантай их сургууль багшийн цалин, оюутнуудын сургалтын орчныг стандартын түвшинд хангаж, чанартай боловсрол олгох чадамж хэр зэрэг байх вэ. Дээд боловсрол олгоно гэдэг бизнес биш. Зөвхөн суралцагчдын төлбөрөөр амь зогоодог их сургуулиудын тоо багасвал чанар нэмэгдэнэ. Энэ асуудалд салбар яам шүүр барьж, цэвэрлэгээ хийж буй нь таатай хэрэг.
Чамлахаар чанга атга гэдэгчлэн 13 их сургууль хаагдлаа. Мэдээж чанар стандарт хангаагүй нь ойлгомжтой. Тэгвэл үлдсэн их сургуулиуд шалгарлын хуулиар шигшигдэх ёстойг холбогдох яам жигдлээсэй гэж хүсэх иргэн олон байна.
Хувийн сургуулиудыг муу гэж гоочлоогүй. Гагцхүү боловсролыг хувийн бизнесийн ашиг сонирхолтой хутган, үнэ цэнийг нь унагах ёсгүй. Үнэн хэрэгтээ боловсролын салбар улс орон бүрд хамгийн эмзэг нь. Шинэчлэл реформоос хоцорвол улиг болчихдог. Иймд ширүүхэн дайрч шулуухан цэгцлэх нь чухал.
Эрх ашиг зөрчсөн үү.......
Нийт 163 багш, 1567 оюутантай 13 их сургуулийг татан буулгасан. Оюутнуудын эрх ашгийг зөрчөөгүйн дээр харин ч илүү нэр хүндтэй дээд сургуульд суралцах боломжийг олгож байгаа хэмээн салбар яамнаас хэлж байв.
Харин МУИС, ШУТИС зэрэг сургуулийн зарим оюутан дээрх үйл явдалд шүүмжлэлтэй хандаж байв. Учир нь бид хичээл зүтгэл гарган 700, 800 оноо авч эдгээр сургуульд орсон атал, сургуулиудыг нэгтгэж байгаа нэрийдлээр муу оноотой сурагчид бидэнтэй адил сургуульд суралцахаар болж байна. Тийм бол анхнаасаа босго оноо тогтоож, төгсөгчдийг эрэмбэлэх хэрэг байсан уу гэх зэргээр асуудалд хандаж байлаа.
Эцэст нь хэлэхэд боловсролын салбарын боловсруулалт болоогүй байна. Үргэлжлүүлэх л хэрэгтэй…
Эх сурвалж: Erennews.mn
