Төрийн өмчит 106 компани байдгийн 17 нь ЗГХЭГ-ын харьяанд байдаг гэдгийг ТӨБЗГ-ын дарга Б.Цэнгэл хэлсэн. ЗГХЭГ-т тэгвэл “Эрдэнэс Монгол” нэгдлийн “Эрдэнэс Тавантолгой” ХК, “Эрдэнэс Оюутолгой” ХХК, “Багануур” ХК, “Шивээ-Овоо” ХК, “Мон-Атом” ХХК, “Эрдэнэс Шивээ Энержи” ХХК, “Эрдэнэс Метан” ХХК, “Эрдэнэс Ассет Менежмент” , “Эрдэнэс алт ресурс”, “Эрдэнэс стийл”, “Эрдэнэс ашид”, “Эрдэнэс селвир ресурс”, “Монголын Эрдэнэс баялгийн бирж”, “Гашуун Сухайт Авто Зам” ХХК, “Газрын ховор элементийн судалгааны төсөл”, “Эрчим хүчний шивээ энержи”, “Эрдэнэс ган” төсөл зэрэгт бүтцийн өөрчлөлт хийх юм.
2020 оны мэдээгээр эдгээр 17 компанийн нийт хөрөнгө 14 их наяд 598 тэрбум төгрөг. Төрийн өмчит компаниуд 2020 онд 204.3 тэрбум төгрөгийн цэвэр ашигтай ажилласны 47.2 тэрбум нь дээрх 17 компанид харьяалагддаг. Харин авлага нь 249 тэрбум, өр төлбөр нь 2 их наяд 720 тэрбум, орлого 376 тэрбум, зардал 311 тэрбум, татвар 43 тэрбум гэсэн баримт байгаа юм. Ингээд харвал өр төлбөр багагүй байгаа ч нийт 8.7 тэрбум төгрөгийн ногдол ашиг хуваарилжээ. Одоогоор ТУЗ-ийн даргаар ЗГХЭГ-ын тэргүүн дэд дарга Б.Ганбат ажилладаг.
