Колумбын хар тамхины мафийн толгойлогч, олон зуун хүний аминд хүрсэн зартай алуурчин Пабло Эскобар анх мөнгөжихдөө шарилын газрын хөшөөнүүдийг тонож, нэг хэсэгтээ л чулууны чeнж хийсэн байдаг. Тэгвэл манай төмрийн чeнжүүд "Далан давхар"-ын оршуулгын газрын хамаг төмрийг цөлмөөд урагш нь гаргачихсан. Өнгөрсөн зууны дал, ная, eрээд онд талийгаачдыг оршуулахдаа цeмeнтнийх нь эргэн тойронд зузаан төмрөөр хашлага хийдэг моод дэлгэрсэн. Зарим нь бас шарилынх нь гадна талаар төмөр хайс хийдэг байв. Тиймээс "Далан давхар"-т маш их төмөр хуримтлагдаж байлаа. Одоо бол тэр их төмөр нохойн замаар оржээ. Эндхийн бүхий л шарилын төмрийг лоомоор ховх татаж аваад бөмбөгдүүлсэн юм шиг ундуй сундуй болгож орхижээ. Тэр байтугай хүндэтгэж явдаг Хадбаатар аваргынхаа шарилын төмрийг хүртэл ховх татаад авчихаж. За энэ ч яахав, чимээгүй хотыг чимээгүйгээр нь далимдуулаад чимээгүйхэн тоночихсон чeнжүүдийн үйлдэл. Харин одоо бол төр засгийн зүгээс эндхийн бүх шарилыг хуу арчиж цэцэрлэгт хүрээлэн барихаар болжээ. За бараг энэ нь ч зөв байх аа. Гэхдээ нэг асуудал бий. Анхандаа олон түмний хэл амыг дарахын тулд төрийн нэр барьж гарч ирээд явцын дунд бичиг баримтандаа бага сага засвар хийж байсаар аль нэг хувийн компанийн, эсвэл хэдэн олигархийн эзэмшил болгочихдог овжин туршлага бий. Жишээлбэл Нийслэлчүүдийн хөрөнгө хүчээр боссон "Улаанбаатар" банкийг юу болгож хувиргасан билээ. Энэ банк Ми.Энхболд, Т.Бадамжунай нарын шуналын саварт өртөж дууссан гашуун түүхтэй. Тиймээс "Далан давхар"-ын өргөн уудам газар нутаг цаашдаа төрийн нэр барьсан хэдэн олигархийн гарт орохгүй гэсэн баталгаа хаана байна?
