Бүртгэл мэдээллийн https://opendatalab.mn/ сайт эрх баригч Монгол ардын нам /МАН/-ын мэдээллийг “БНХАУ хувь эзэмшдэг” хэмээн мэдээлсэн байгааг мэдээллийн Эгүүр.мн сайт өнөөдөр олон нийтэд мэдээлсэн. Ингэснээр “эрх баригч намын бүтцэд гадаад улсын оролцоо байгаа” гэх мэдээлэл нийгмийн сүлжээнд түгээд байна.
Бид энэ асуудлаар, МАН-ын Хууль эрхзүйн хэлтсийн дарга Ү.Амарбатаас тодруулахад “Улсын бүртгэлийн http://opendata.burtgel.gov.mn/ сайт бол албан ёсны сайт. Уг сайтад манай намын талаарх бодит мэдээлэл бий. Харин өнөөдрийн яригдаж буй Opendatalab.mn сайтын тухайд “Бодлогод залуусын хяналт” ТББ-аас ажиллуулдаг сайт юм байна лээ. Тус сайтынхан санаатай, санаандгүй чухам ямар учраас МАН-ын мэдээллийг БНХАУ-тай холбож нийтэлснийг мэдэхгүй байна. Бид тус сайт руу холбогдсон, тус сайтын зүгээс залруулга гаргасан байна лээ. МАН-ын бүртгэл мэдээлэл Улсын дээд шүүх дээр ч бий. Хятадтай холбоотой ямар ч асуудал байхгүй” гэсэн тайлбар хэллээ.
