Шведийн эрх баригч нам НАТО-д элсэх эсэх асуудлаар мэтгэлцээнд бэлтгэж байх үед иргэдийн дунд явуулсан хамгийн сүүлийн үеийн судалгаагаар тус улсын ард иргэдийн ихэнх нь НАТО-д элсэхийг дэмжиж байгаа үр дүн гарчээ.
Тус улсын санал асуулга, судалгааны “Novus” агентлаг ард иргэдийн дунд явуулсан судалгааны дүнгээ пүрэв гарагт танилцуулав.
Санал асуулгын дүнгээр Швед улсын ард иргэдийн 51 хувь нь НАТО-д элсэхийг дэмжсэн байна. Үүнээс нэг долоо хоногийн өмнө мөн адил санал асуулга явуулахад иргэдийн 45 хувь нь дэмжиж байжээ.
ОХУ Украин улс руу довтолсон нь Финлянд, Швед улсуудыг НАТО-д элсэх талаар бодоход хүргэсэн.
“Novus” агентлагийн үзэж буйгаар, хөрш Финлянд улсад явуулж буй НАТО-гийн хэлэлцүүлэг Шведийн олон нийтийн санаа бодолд нөлөөлж байна гэж үзжээ.
Финлянд улс 6 дугаар сард болох НАТО-гийн уулзалтад оролцохын тулд НАТО-д элсэх санал тавина гэж олон шинжээчид таамаглаж байна.
Судалгаанд оролцогчдын 64 хувь нь “хэрэв Финлянд улс НАТО-д элсвэл Швед улс НАТО-д элсэхийг дэмжинэ” гэдгээ илэрхийлжээ.
Орон нутгийн “Aftonbladet” сонин Шведийн Социал Демократ намаас иш татан мэдээлэхдээ, тус нам баасан гарагаас эхлэн НАТО-гийн асуудлаарх “цуврал хурал” зохион байгуулна гэв.
Энэ нь тус намын хувьд уг асуудлаарх анхны томоохон хэлэлцүүлэг болж байгаа юм.
Montsame.mn