Энэтхэгийн Ченнай хотод 12 хоногийн турш үргэлжилсэн 44 дэх удаагийн Шатрын олимпиад өчигдөр өндөрлөв.Тодруулбал, сүүлийн өдөр 11 дэх өрөгт манай эрэгтэй баг Кыргызстаны багийг 2,5: 1,5 оноогоор хожиж, манай эмэгтэй баг Францын шатарчидтай 2:2-оор "эвийн гэрээ" байгуулав. Манай эрэгтэй баг 188 багаас 35 дугаар байрт, эмэгтэй баг 162 багаас 15 дугаар байрт шалгарлаа. Н.Гаприндашвилигийн цом буюу эрэгтэй, эмэгтэй багийн нийлбэр дүнгээр Монголын шатрын холбоо дэлхийд 24 -т эрэмбэлэгдлээ. Харин ширээний дүнгээр эмэгтэйчүүдээс дөрөвдүгээр ширээнд Б.Мөнгөнзул, нэгдүгээр байр эзлэн, алтан медаль хүртлээ. Тэрбээр нийт 10 өрөг тоглож, найман хожил, нэг тэнцээ, нэг хожигдон ширээндээ тэргүүлэв. Гуравдугаар ширээнд Т.Мөнхзул 11 өрөг тоглохдоо таван хожил, зургаан тэнцээтэй, нэг ч хожигдолгүй тэмцээнээ өндөрлүүлж, ширээндээ зургадугаар байр эзэллээ. Ингэснээр их мастер цолны болзлыг биелүүллээ. Мөн нэгдүгээр ширээнд А.Энхтуул 19-д, эрэгтэйчүүдээс гуравдугаар ширээнд Б.Гүндаваа 16- р байрт буюу "Топ-20"-д багтлаа.
П.АМГАЛАНБАЯР
