Тус улсын 25 сая хүн вакцинжуулалтын хөтөлбөр дутмаг, эрүүл мэндийн тусламж үйлчилгээ муу байгаагаас эмзэг байдалд байна гэж мэргэжилтнүүд анхааруулав.
БНАСАУ-ын эрх баригчид тус улсад коронавирусын анхны дэгдэлт илэрсэнээс хойш Ковид-19-ийн халдвар авсан бүх оршин суугчид эдгэрч байгааг зарлалаа. Мэргэжилтнүүд Хойд Солонгосын албаныхны ялалтын мэдэгдэлд эргэлзэж байна.
Солонгосын төв мэдээний агентлаг (KCNA) "Өнгөрсөн долоо хоногт халууралтын нэг ч шинэ тохиолдол гараагүй, (БНАСАУ коронавирусыг ингэж нэрлэдэг) улс даяар эмчилгээ хийлгэсэн бүх өвчтөнүүд эдгэрсэн" гэж мэдэгдэв.
Хойд Солонгос бол хамгийн хаалттай орнуудын нэг бөгөөд бие даасан эх сурвалжаас авсан мэдээллийг шалгах боломжгүй юм.
Хойд Солонгос анхнаасаа вакцин болон бусад гадны эмнэлгийн тусламжаас татгалзсан бөгөөд тус улс өөрөө дэлхийн хамгийн муу эрүүл мэндийн тогтолцоотой орон юм.
БНАСАУ-ыг судлаач Ан Чанг-Илийн хэлснээр "Аль ч улс орон өвчтөний батлагдсан тоо гэнэт тэг болж буурсан гэж хэлэхэд итгэхэд бэрх." гэжээ.
Пхеньян энэ оны тавдугаар сарын эхээр коронавирусын халдварын анхны тохиолдол бүртгэгдсэн. Дараа нь албан ёсны агентлаг тус улсад 18 мянга гаруй өвчний тохиолдол илэрч, зургаан хүн нас барсан гэж мэдэгдэв. Үүний дараа БНАСАУ-д "хамгийн их онц байдлын" дэглэм нэвтрүүлж, хөл хорио тогтоожээ.
"Халуурах" гэж оношлогдсон 4.5 сая гаруй өвчтөн энэ оны 4-р сараас хойш бүрэн эдгэрсэн бөгөөд 74 хүн нас барсан гэж тус улсын хэвлэл мэдээллийн хэрэгслүүд мэдээлж байгаа юм.
Албан ёсны мэдээллээр БНАСАУ нь коронавирусын нас баралтын түвшин хамгийн бага буюу 0.002% байна. Гэвч олон шинжээчид энэ мэдээллийн найдвартай байдалд эргэлзэж байгаа юм.
Сөүлийн Ханьян их сургуулийн Анагаах ухааны сургуулийн профессор Шин Ён Жон “Ройтерс” агентлагт ярихдаа Хойд Солонгост 50,000 хүртэл хүн коронавирусын улмаас нас барсан байж магадгүй юм гэжээ.
Эх сурвалж: ВВС
