ОХУ-ын Ерөнхийлөгч Владимир Путин, Туркийн Ерөнхийлөгч Режеп Тайип Эрдоган Сочид уулзасан.
Туркийн Ерөнхийлөгч Режеп Тайип Эрдоган хэлэхдээ, манай улс Орос, Украины удирдагч Владимир Путин, Владимир Зеленский нарын хэлэлцээний талбар болж чадна. Украины хямралыг яриа хэлэлцээний замаар шийдвэрлэх ёстой гэж онцолсоныг РИА Новости мэдээллээ.
Бодит байдал дээр асуудал хүндрэлтэй байгаа ч Украины хямралыг хэлэлцээрийн ширээний ард шийднэ гэдэгт би итгэлтэй байна. Бид ноён Зеленскийтэй уулзах боломжтой гэдгийг Ерөнхийлөгч Путинд дахин санууллаа" гэж Туркийн Ерөнхийлөгчийн хэлсэн үгийг тус агентлаг иш татав.
Анкара Оростой харилцаагаа бүх талаар хөгжүүлэх болно гэж Эрдоган нэмж хэлэв. Тодруулбал, Сочид болсон хэлэлцээний үеэр талууд эдийн засгийн хамтын ажиллагааны замын зурагт гарын үсэг зурж, худалдааны эргэлтийг 100 тэрбум ам.долларт хүргэхээр зорьж байна.
Үүнээс гадна Эрдоган Оросын Мир картыг Туркт хэрэгжүүлэх талаар Путинтэй ярилцсан тухайгаа дурджээ. Түүний хэлснээр энэ асуудалд “онцгой ахиц” байгаа. Мир картыг ашиглах боломж нь Турк дахь Оросын жуулчдыг илүү тохь тухтай болгоно гэв.
Путин, Эрдоган нар Оросоос Туркт нийлүүлэх байгалийн хийн төлбөрийг рублиэр хэсэгчлэн төлөхөөр тохиролцсон тухай өмнө нь мэдээлж байсан. Туркийн “Haber7” сонины уншигчид энэхүү шийдвэрийг дэмжиж, энэ хэлэлцээр нь Америк, Европын мөнгөн тэмдэгтийн ноёрхлыг зогсоож болзошгүйг онцолсон байна. Тэд мөн Оросыг АНУ, ЕХ-ноос илүү шударга гэж үзэж байгаа нь анзаарагдаж байна.
Эх сурвалж:NEWS.ru
