Аль-Кайда бүлэглэлийн толгойлогч Айман Завахириг Кабулд Америкчууд саяхан устгасан. Харин үүний дараа энэхүү террорист байгууллагын удирдлагыг цааш хэн авч чадах вэ гэдэгт анхаарал хандуулж байна. Өөрөөр хэлбэл Усама Бен Ладен, Айман Завахири нарыг залгамжлах гуравдагч удирдагч хэн байх вэ.
Тэгвэл Египетийн уугуул Сейф аль-Адел хамгийн өндөр магадлалтай хүнээр нэрлэгдэж байна. Тэрбээр Аль-Каидагийн таван ахмад дайчдаас амьд үлдсэн цорын ганц хүн бөгөөд нэгэн цагт Завахиригийн орлогчоор ажиллаж байсан түүнийг үндсэн залгамжлагч гэж тооцож байна.
Гэхдээ тэр хаана байгаа нь тодорхойгүй ч одоогоор аль-Аделыг Аль-Каидагийн заналт дайсан гэж үздэг Иранд амьдардаг гэсэн таамаглал олон нийтийн дунд бий.
Жихадын ахмад дайчин
Аль-Кайда бүлэглэлийг үндэслэгч, Осама Бин Ладены итгэмжлэгдсэн туслах аль-Адел бол маш нууцлаг нэгэн бөгөөд жихадын үйл хэрэгт хүндлэгдсэн ахмад дайчин юм.
Түүнийг АНУ-ын эрх баригчид сонирхож байгаа нь гарцаагүй бөгөөд тэр Холбооны мөрдөх товчооны хамгийн идэвхтэй эрэн сурвалжлагдаж буй террористуудын жагсаалтад багтдаг. Түүний оршин суугаа газрын талаар мэдээлэлд 10 сая долларын шагнал амлаад буй.
Аль-Адел нь Аль-Каида бүлэглэлийг үндэслэгч Осама бин Ладен болон түүний орлогч Завахири нарын гол холбоотон байв
Сейф аль-Аделийг 1998 оны наймдугаар сард Танзани, Кени дэх Америкийн элчин сайдын яамдыг нэгэн зэрэг дэлбэлж, 220 гаруй хүний аминд хүрсэн хэрэгт буруутгаж байгаа юм. Үүний зэрэгцээ есдүгээр сарын 11-ний Нью-Йорк, Вашингтонд болсон халдлагыг тэр эсэргүүцсэн гэсэн таамаглал бас байдаг.
Тэр хэн бэ
Аль-Каидаг залгамжлах магадлалтай шинэ удирдагчийн амьдралын талаарх мэдээлэл маш бага. Холбооны мөрдөх товчооны мэдээлснээр аль-Адел 1963 оны дөрөвдүгээр сарын 11-нд төрсөн.
Тэр Аль-Кайда бүлэглэлийн статустай байсан ч ихэвчлэн бага зэрэг нэр хүндтэй, тус бүлэглэлийн суртал ухуулгад бараг оролцоогүй. Түүнийг үнэхээр хэн бэ гэдэгт эргэлздэг. Сейф аль-Адел гэдэг нь арабаас "Шударга ёсны сэлэм гэж орчуулагдах бөгөөд энэ нь түүний нууц нэр байх магадлалтай.
Вест Пойнтын судлаачид аль-Аделийг Египетийн тусгай хүчний хурандаа асан Мохаммед Ибрахим Маккави гэж андуурах нь бас цөөнгүй.
Тэр 1980-аад онд Аль-Каида бүлэглэл байгуулагдаж байх үед Зөвлөлтийн цэрэг Афганистаныг эзлэн түрэмгийлсний эсрэг Бин Ладентай хамт тэмцэж байсан гэдгээрээ алдартай.
Хожим нь Аль-Адел Сомали руу нүүж, Сомалийн иргэний дайнд АНУ-ын хөндлөнгөөс оролцохыг эсэргүүцсэн дайчдыг сургахад тусалсан. Энэхүү кампанит ажын үеэр Могадишу хотод АНУ-ын хоёр MH-60 Black Hawk нисдэг тэргийг унагаснаар ихэд алдаршсан бөгөөд 2001 онд энэ үйл явдлаас сэдэвлэн Холливуд "Black Hawk Down" /Хар харцагын уналт/ киног бүтээсэн гэдэг.
Нисдэг тэргийг онилсон пуужингийн нэгийг Сейф аль-Аделийн отрядын тунис хүн харвасан гэж үздэг.
Аль-Адел 90-ээд оны дундуур Талибанчууд тус улсад хяналтаа бэхжүүлж байх үед Афганистанд буцаж иржээ. 2001 онд АНУ-ын түрэмгийллийн дараахан тэрээр дахин гарч, аюулгүй байдлын сүлжээгээр дамжуулан Аль-Кайда бүлэглэлийг Иран руу чиглүүлжээ. Ираны эрх баригчид түүнийг 2003 онд баривчилсан гэдэг бөгөөд 12 жилийн дараа Аль-Каидагийн хэд хэдэн гишүүний хамт солилцоогоор суллагдсан гэх мэдээлэл байдаг.
Аль-Адел удаан хугацаагаар шоронд хоригдсон хэдий ч Аль-Каидагийн хүчирхэг хүн хэвээр байсан бөгөөд 2011 онд Пакистанд Америкийн тусгай хүчнийхэн Бин Ладеныг устгасны дараа Завахиригийн удирдагчийн байр суурийг бэхжүүлэхэд тусалсан.
Харин Америкийн терроризмын шинжээч Колин П.Кларк хэлэхдээ, аль-Адел Иранд хэвээр байгаа бөгөөд "хагас гэрийн хорионд" амьдарч байна гэжээ. Хэрэв энэ үнэн бол түүний "карьерын өсөлтөд" саад тээг учруулж болзошгүй юм.
Учир нь нэгдүгээрт, шийтийн улсын хязгаарлалтын дор амьдарч байгаа түүнийг дэлхийн жихадист бүлгийг үр дүнтэй удирдаж чадна гэж төсөөлөхөд бэрх. Хоёрдугаарт, аюулгүй байдлын асуудал бас бий.
Аль-Каидагийн өөр нэг ахлах гишүүн Абу Мухаммад аль-Масри 2020 онд Тегеранд халдлага үйлдэж амиа алдсан юм.
Эх сурвалж: ВВС
