АНУ-ын Төлөөлөгчдийн танхимын дарга Нэнси Пелоси аралд айлчилсантай холбогдуулан Хятадын эрх баригчид Тайваньд хориг тавьж эхэлжээ. Энэ тухай ТАСС мэдээлэв.
Энэ хоригийн хүрээнд наймдугаар сарын 3-ны лхагва гарагаас эхлэн Бээжин Тайваньд элс нийлүүлэхээ зогсоолоо.
Түүнчлэн 8-р сарын 3-наас Хятад улс Тайванаас цитрус жимс, нимбэг, бэрсүүт жүрж, жүрж болон хоёр төрлийн загасны бүтээгдэхүүний импортыг зогсоож байгаагаа зарлав. Арлын эсрэг түр хязгаарлалт хийх болсон шалтгааныг нэрлээгүй байгаа ч эдийн засгийн шинэ хориг арга хэмжээ нь АНУ-ын Конгрессын Төлөөлөгчдийн танхимын дарга Нэнси Пелосигийн айлчлалын үеэр үүссэн хурцадмал байдалтай холбоотой гэж хэвлэлүүд онцолж байна.
Тайванийн хоёр сангийн эсрэг хориг арга хэмжээ авав
Худалдааны хязгаарлалтаас гадна Тайваний салан тусгаарлагчдыг дэмжиж, Хятадыг гүтгэсэн хэргээр Тайванийн хоёр санд хориг тавьжээ. Эдгээр нь Тайваний ардчиллын сан, Олон улсын хөгжлийн хамтын ажиллагааны сан юм.
БНХАУ-ын Төрийн зөвлөлийн дэргэдэх Тайванийн хэрэг эрхлэх газрын албан ёсны төлөөлөгч Ма Шиаогуан "Эдгээр байгууллага нь Тайванийн салан тусгаарлах үзлийн элементүүдтэй холбоотой, манай улсыг гутаан доромжилж, олон улсын хамтын нийгэмлэгт нөлөөлж Нэг Хятад зарчмыг зөрчихийг оролдсон" гэж тодотгов.
БНХАУ-ын эрх баригчид эдгээр сангийн хөрөнгөөр эх газрын Хятад дахь байгууллага, аж ахуйн нэгж, хувь хүмүүс хамтран ажиллахыг хориглосон байна.
Түүнчлэн эрчим хүч, анагаах ухаан, хиймэл дагуул, сүлжээний технологийн чиглэлээр үйл ажиллагаа явуулдаг Тайваний хэд хэдэн компани хориг арга хэмжээнд хамрагдсан бөгөөд тэд эдгээр сангуудад санхүүжилт олгосны улмаас ийнхүү хоригт оржээ.
Энэхүү хоригийн улмаас дээрхи хоёр санг санхүүжүүлсэн компаниудын удирдлага, хариуцлагатай хүмүүс эх газрын Хятадад айлчлах, Хятадын аж ахуйн нэгжүүдтэй хамтран ажиллах эрхгүй болж байна.
"Түргэвчилсэн уналт"
Ма Шиаогуан хэлэхдээ, "Бид Тайванийн Ерөнхийлөгч Цай Инвэнь болон арлын эрх баригч Ардчилсан дэвшлийн намд анхааруулж байна. Тайванийн тусгаар тогтнолыг гадаадын хүчний дэмжлэгтэйгээр баталгаажуулах гэсэн тэдний өдөөн хатгалга нь эцсийн дүндээ арлын одоогийн удирдлагыг сүйрүүлж, бүс нутгийг гамшгийн байдалд оруулах болно" гэжээ.
Тэрбээр цааш хэлэхдээ "Тусгаар тогтнол, нутаг дэвсгэрийн бүрэн бүтэн байдлаа хамгаалах" Хятад улсын шийдэмгий байдлыг хэн ч дутуу үнэлж болохгүй гэж онцолжээ.
Дашрамд сануулахад Пелоси Тайпейд айлчлалынхаа үеэр парламентын дэд дарга Цай Чичан, Ерөнхийлөгч Цай Ин Вэнь нартай уулзаж ярилцсан байна. Уулзалтын дараа Пелоси хэлэхдээ, АНУ ойрын хугацаанд Тайваньтай худалдааны гэрээ байгуулж магадгүй гэж мэдэгдснийг Блүүмберг телевиз мэдээлэв.
Эх сурвалж: Лента.ру болон Theins.ru/news
