Монголчууд мах гурил хоёр байхад нэг болно доо гэж ярьдаг. Үнэндээ ч тийм байсан цаг бий. Элдэв янзын ногоо цагаагүй, амтлагчгүй, ер нь л эко хоол хүнс хэрэглэдэг байж, тэр үед.
Орчин цагтайгаа хөл нийлж элдэв чамин юманд нүд алдахын хэрээр бид гадагшаа мөнгөө алдаж, гадныхнаас хараат болж буйгаа ч маш сайн мэдэрч байгаа.
Гэхдээ бид бараг 70, 80 саяар тоологдох малтай хэрнээ махны үнэ нь ингэж тэнгэрт хадсан улс манайхаас өөр үзээд өгье гэсэн ч хаана ч байхгүй гэж бардам хэлэх байна.
Өнөөдрөөс яг 10 жилийн өмнө бид талхаа 600-900 төгрөгөөр авч иддэг байв. Харин махны тухайд өнөөдрийнхөөс 50-60 хувиар хямд үнэтэй байж. Тэгвэл доорх баримтаас Монгол Улсын эдийн засаг өсч, өгсөж биш уруудаж, буруудаж байгааг харж болно. Дээрээс нь цар тахал гэх сайхан ШАЛТАГ дэмнээд өгсөн.
Гэхдээ бидэнд эдийн засгаа сэргээж улсаараа элбэг дэлбэг амьдрах боломж бий гэдгийг Монгол Улсын Ерөнхийлөгч У.Хүрэлсүх болон түүний багийнхан олж харсан учраас “Хүнсний хувьсгал”-ыг эхлүүлж 19 нэр төрлийн бүтээгдэхүүнийг эх орондоо үйлдвэрлэхийг уриаллаа. Алс сонсогдож байгаа ч “Хонгилын үзүүрт гэрэл” харагдаж эхэллээ.
Үнэндээ манайх шиг жижигхэн эдийн засагтай хүн ам цөөн улсад сүүний чиглэлийн 30 ферм байгуулахад сүү, сүүн бүтээгдэхүүнээр төвөггүй хангаж, гадаадаас оруулж ирж байгаа, хуурай сүүний урсгалыг тэр чигт нь зогсоож чадна.
Хүнсний хувьсгал" бол зөвхөн хүнс үйлдвэрлэх явц биш. Хүнсний хувьсгал бол хүн амын эрүүл саруул аж төрөх хийгээд цаашлаад Монгол Улсын бүрэн бүтэн, халдашгүй дархан байдал гэсэн үг.
Товчхондоо бол “Хүнсний хувьсгал”-ыг хөдөө аж ахуйн хувьсгалтай хамтад нь хийж гэмээнэ бид өнөөдрөөс яг 10 жилийн дараа сэргэн мандсан, орчин үеийн, үйлдвэрлэл, үйлчилгээ түлхүү хөгжсөн, эдийн засгийн хараад бус Монгол Улсыг харах учиртай юм.
Эх сурвалж: С.Цээл, Erennews.mn
