ОХУ-ын Гадаад хэргийн сайд Сергей Лавров Шанхайн Хамтын Ажиллагааны Байгууллага (ШХАБ)-д элсэх хүсэлтэй орнууд “дараалал"-тай байгаа талаар мэдэгдлээ гэж РИА Новости мэдээллээ.
“Самаркандад болох дээд хэмжээний уулзалтын хэлэлцэх асуудлыг хатуу тогтсон, бүрэн дүүрэн байгаа бөгөөд ШХАБ-ын бүрэн эрхт гишүүн болон ажиглагч, түншээр элсэх хүсэлтэй улс орнууд Самаркандын дээд хэмжээний уулзалтад дараалал үүсгэж байгаа нь онцгой бэлгэдлийн чанартай юм. Яриа хэлэлцээ явагдаж байна” гэж ШХАБ-ын гишүүн орнуудын Гадаад хэргийн сайд нарын хүрээнд Узбекистаны Ерөнхийлөгч Шавкат Мирзиёевтэй Ташкентад яриа хэлэлцээ хийсний дараа мэдэгдэв.
Тодотгоход ШХАБ-ын гишүүн орнуудын тэргүүн нарын 27 дахь дээд хэмжээний уулзалт есдүгээр сарын 15-16-нд Самарканд (Узбекистан) хотод болно.
Шанхайн хамтын ажиллагааны байгууллага (ШХАБ) нь 2001 оны 6-р сарын 15-нд Хятад, Орос, Казахстан, Тажикистан, Киргизстан, Узбекистан улсын удирдагчдын санаачилгаар байгуулагдсан олон улсын байгууллага юм. Үүнээс хожуухан Энэтхэг, Пакистан хоёр тус байгууллагын бүрэн эрхт гишүүн болжээ.
2021 оны 9-р сард Иран элсэх өргөдлөө өргөн барьсан бөгөөд тус улс 2022 оны 9-р сард элсэх төлөвтэй байна. Түүнчлэн хэд хэдэн орон ажиглагч, яриа хэлэлцээний түнш гэсэн статустай байгаа юм. ШХАБ-ын гишүүн орнуудад 3,4 тэрбум хүн амьдардаг бөгөөд энэ нь дэлхийн хүн амын тал орчим хувийг эзэлж байна гэсэн үг юм.
Сануулахад, өнгөрсөн долдугаар сард Беларусь улс Шанхайн хамтын ажиллагааны байгууллагад бүрэн эрхт гишүүнээр элсэх хүсэлтээ гаргаад байгаа юм.
Эх сурвалж: АиФ