Ховд аймгийн Жаргалант сумын нутаг дэвсгэрт зургаан Өрхийн эрүүл мэндийн төв (ӨЭМТ) үйл ажиллагаа явуулж байна.
Тус өрхийн эрүүл мэндийн төвүүд эрүүл мэндийн даатгалын үйлчилгээний давуу талыг сурталчлах, эрүүл мэндийн даатгалын шимтгэл төлсөнөөр тогтмол үнэ төлбөргүй авч болох эмнэлгийн тусламж, үйлчилгээний хүртээмжийн талаар иргэдэд мэдээлэл түгээх зорилгоор “Эрүүл мэндийн даатгалаа төлөхийн ач холбогдол” сэдэвт нэг сарын аян өрнүүлж эхэлжээ.
Хуульд заасны дагуу иргэн-даатгуулагчид эрүүл мэндийн даалтгалын шимтгэлээ цаг тухай бүрт нь төлсөнөөр гэнэтийн учирч болзошгүй эрсдэлээс урьдчилан сэргийлж, хэрэгцээтэй эрүүл мэндийн тусламж, үйлчилгээгээ цаг алдалгүй авах боломж бүрдсэн.
Онцлоход, Жаргалант сумын Бугат ӨЭМТ нь мэргэжлийн эмч, сувилагч, ажилтнуудаас бүрдсэн 13 хүний орон тоотойгоор үйл ажиллагаа явуулж байна.
Энэ хамт олон Бугат, Хайрхан, Тахилт, Алагтолгой багийн 1830 өрхийн 7935 иргэнд эмнэлгийн анхан шатны тусламж үйлчилгээг түргэн шуурхай, тэгш хүртээмжтэйгээр үзүүлсээр иржээ.
Иргэд эрүүл мэндийн даатгалын шимтгэлээ төлж, өөртөө хамгийн ойрхон байгаа анхан шатны нэгжээр дамжуулан өдрийн эмчилгээ, сэргээн засах тусламж үйлчилгээ, түргэвчилсэн оношилгоо шинжилгээнд үнэ төлбөргүй хамрагдаж, гэрээр үзүүлэх тусламж үйлчилгээг ч мөн цаг алдалгүй авахыг эмч нар зөвлөлөө.
Иргэн-даатгуулагчид өөрийн шимтгэл төлөлтийн мэдээллээ цахим сайтаас шалгах, Ebarimt, Edaatgal аппликэйшнээр дамжуулан эрүүл мэндийн даатгалын шимтгэлээ нөхөн төлөх боломжтой.
