МҮЭХ-оос цаг үеийн асуудлаар мэдээлэл хийлээ. МҮЭХ-ны Ерөнхийлөгч С.Эрдэнэбат "Цалин хөлс хоёр талаас олгогдох маргаантай асуудал удаан үргэлжиллээ. Засгийн газраас энэ чиглэлээр тодорхой төсвийн тодотгол хийж, хуучнаар нь байлгахаа мэдэгдсэн. Энэ хаврын чуулганаар төсвийн тодотголоор хэлэлцэнэ. Хэрэв үүнийг цаашид үргэлжлүүлбэл бид тэмцлээ үргэлжлүүлнэ.
Мөн хөдөлмөрийн хөлсний доод хэмжээний асуудал бий. УИХ 2023 оноос нааш хөдөлмөрийн хөлсний хэмжээг өөрчлөхгүй гэсэн хуулийн заалтыг сэмээрхэн нэмчихсэн. Ард түмнийхээ эсрэг яагаад ийм хачин зүйл хийдэг юм бэ. Цалинг нь нэмэхгүй байна гэдэг нь ард түмнээ Монголоос хөөж байгаагаас өөрцгүй. Монгол Улсад хөдөлмөрийн нэг цагийн хөлс багадаа 77 цент бол залуусын очиж ажиллах гэж зүтгээд байгаа БНСУ-д 8,8 ам.доллар байна. Өөрөөр хэлбэл 12 дахин их юм. Монгол Улсын хөдөлмөрийн хөлсний доод хэмжээг нэмэх цаг болсон. Үнэ, инфляцыг үнэхээр барьж чадахгүй байгаа бол ард иргэдийн бодит орлогод нэмэр болохуйцаар цалинг нэмэх, хөдөлмөрийн хөлсний хэмжээг нэмэх, татварыг бууруулах, НӨАТ-ын буцаалтыг нэмэгдүүлэх, ХАОАТ-ыг шатлалтай бууруулах, олон хүүхэдтэй өрхөөс авахгүй байвал оновчтой.Мөн НДШ-ийг буцаан олгох шийдвэрт талархалтай байгаа ч иргэн бүр тэгш эрхтэй. Төрийн болон уул уурхайн байгууллагаас бусад нь гэж ялгаж болохгүй гэсэн шаардлагыг бидэнд хүргүүлсээр байна. Тиймээс бүгдийг хамруулаач гэсэн саналыг ЗГ, УИХ-д хүргүүлсэн" гэв.
