"Зочны цагт" ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн ахмад Г.Отгонтамир оролцож баяр наадмын үеэрх тээврийн хэрэгсэлтэй холбоотой осол гэмтэл, хяналт шалгалтын талаар ярилцлаа.
Баяр наадмын үер орон нутаг руу чиглэсэн хөдөлгөөн хэр их нэмэгдсэн вэ?
Нийслэл Улаанбаатар хотоос хөдөө орон нутаг руу чиглэсэн хөдөлгөөний эрчим эрс нэмэгдсэн. Баяр наадмын үеэр 350 мянга орчим тээврийн хэрэгсэл нийслэл хотоос гарсан.
Энэ жил зам тээврийн осол, гэмтлийн тоо өнгөрсөн жилтэй харьцуулахад хэр нэмэгдсэн вэ?
Энэ жилийн хувьд нийслэлээс орон нутаг руу чиглэсэн хөдөлгөөний тоо эрс нэмэгдсэн. Учир нь, өнгөрсөн хоёр жилийн хугацаанд иргэд цар тахлаас үүдэн хөл хорионд байсан. Зам тээвэртэй холбоотой осол, гэмтэл 2019 онтой харьцуулбал нийслэлийн хотын хэмжээнд баяр наадмын үеэр хүний амь нас хохирсон дуудлага мэдээлэл бэртэгдээгүй. Гэвч явган зорчигч, зорчигч хэлбэрээр мөргүүлж гэмтсэн тохиолдол бүртгэгдсэн.
Тээврийн цагдаагийн албанаас баяр наадмын үеэр ямар арга хэмжээ авч ажилласан вэ?
Тээврийн цагдаагийн албанаас иргэдийн аюулгүй байдлыг хангах үүднээс хоёр үе шаттай арга хэмжээ явуулсан. Нэг нь бол нөлөөллийн арга хэмжээ буюу “Аажуу явбал аяндаа хүрэндээ” гэх аян.
Орон нутгийн замд гарч буй осол гэмтлийн 80-90 хувь нь хурд хэтрүүлж байгаагаас үүдэлтэй. Монголчууд зорьсон газартаа очих гэж цаг товлоод байдаг. Тэдэн цаг гэхэд зорьсон газартаа очно гэх мэт үүнээс үүдэж цагтаа амжихын тулд хурд хэтрүүлдэг. Мөн орон нутагт явуулын хурд хэмжих камер байрлуулсан. Энэ хүрээнд цагдаагийн алба хаагчид 984 хурд хэтрүүлсэн зөрчил бүртгэгсэн.
Орон нутгийн замд хурд хэтрүүлэхтэй холбоотойгоор жолоочийн хариуцлагын талаар дэлгэрэнгүй мэдээлэл өгвөл?
Орон нутгийн замд зөвшөөрөгдсөн хурдны хэмжээнээс 50 хувь хүртэл хэтрүүлсэн бол зөрчлийн тухай хуулиар 50 нэгжээр торгож, жолоочийн онооноос 2 оноог хасдаг. Баяр наадмын өдрүүдэд хурд хэтрүүлэхтэй холбоотойгоор орон нутгийн замд 6 хүний амь нас хохирч 25 хүн хүнд, хөнгөн хэлбэрээр гэмтэж бэртэх тохиолдол бүртгэгдсэн. Орон нутгийн замд хамгаалах бүсээ заавал зүүх хэрэгтэй. Үүнийг жолооч анхааруулж цуг зорчиж буй гэр бүлийн гишүүддээ шаардлага тавих хэрэгтэй. Мөн цуг зорчиж буй хүмүүсийн хувьд тээврийн хэрэгсэл жолоодож буй жолоочийг сатааруулахгүй, аюулгүй байдлыг хангах нь чухал.
Орон нутагт зорчиж буй зорчигчдын хувьд хүүхдээ өвөр дээрээ авч явах тохиолдол байдаг. Хүүхэд аюулгүй тээвэрлэж явах зөрчил дээр цагдаагийн албанаас хяналт хийсэн үү?
Бидний хувьд хурд хэтрүүлэхтэй холбоотой зөрчлөөс гадна, хүүхэд аюулгүй тээвэрлэж зорчих асуудал дээр хяналт шалгалт хийсэн. Эцэг эхчүүд хүүхдээ урдаа өвөр дээрээ авч явснаас үүдэж хүүхдэдээ хоёр дахин илүү эрсдэлийг нэмэгдүүлж байдаг. Учир нь хүүхдийн биеийн жин бага огцом тооромслох зэрэг аваар осолд цуг сууж байгаа хүний биеийн жингээр хянах самбарыг мөргөх зэрэг эрсдэлтэй байдаг. Иймд энэ асуудал дээр мөн адил жолооч, зорчигчдын хариуцлагатай байдал яригдана. Хүүхдээ зориулалтын суудалтай тээвэрлэх, хэрэв нялх хүүхэдтэй хамт зорчиж байгаа бол арын суудалдаа тэвэрч авч явах гэх мэт шаардлагууд байдаг.
